Tơ̆ jơ sơng, Thủ tướng Phạm Minh Chính pơma hơdăh Việt Nam ling lang lăng kăl hơtŏk tơiung tơdrong pơvei hăm Hungary, Teh đak jang hơdai tôm tơdrong mă blŭng kơ Việt Nam tơ̆ Trung Đông Âu. Thủ tướng Phạm Minh Chính athei 2 păh pơvei pơma dơnuh khŭl rim kơdră, mă kăl ‘noh kơdră kơpal. Kơdră tơm Szijjártó Péter pơma hơdăh Hungary ‘meh vă pơtrŭt pran kơtang hloh dơ̆ng tơdrong pơvei tơbôl joăt joe păng jang hơdai lơ tơdrong hăm Việt Nam, teh đak jang hơdai gĭt kăl hloh kơ Hungary tơ̆ Đông Nam Á. 

Pơma dơnuh găh dôm tơdrong apŭng plĕnh teh păng tơring vang bơngơ̆t truh, Thủ tướng Phạm Minh Chính păng Kơdră tơm Szijjártó Péter drơ̆ng nơ̆r 2 teh đak đei lơ tơdrong vă lei lăi băl lơ̆m tơdrong jang tơgŭm tơbôl, kăl kơ hơtŏk loi dơ̆ng tơƀơ̆p, pơma dơnuh, jang hơdai tơ̆ rim hop akŏm lơ pang; vang drơ̆ng 1 nơ̆r rơngei, jang hơdai păng hơtŏk tơiung hơnơ̆ng jing trong jang atŭm kơ apŭng plĕnh teh, dôm tơdrong tơgar băl kăl athei đei sek tơlang pơ ‘lơ̆ng hăm trong jang rơngei kiơ̆ lơ̆m khôi luơ̆t apŭng plĕnh teh, yua kơ tơdrong đei yua ăn kon pơlei dôm hơdrĕch hơdrŭng.