Roi tơbăt găh dôm tơdrong hơgăt păng dôm trong jang hơtŏk tơiung hơnhăk teh đak kơ Việt Nam lơ̆m chăl ‘nao, Thủ tướng ‘meh vă Nhật Bản pơma atŭm păng Khŭl kơdră chĕp kơ̆l dêh char Tochigi, kŭm nhen ƀok Kơdră Fukuda hơnơ̆ng tơgŭm, jang hơdai hăm Việt Nam.

Thủ tướng athei dêh char Tochigi hơnơ̆ng bơngơ̆t truh, pơtrŭt, tŭn dôm anih mơdro sa pơih să tơmơ̆t jên jang lơ̆m Việt Nam lơ̆m dôm tơdrong jang mă dêh char đei tơmam pran; hơtŏk loi dơ̆ng jang hơdai, pơtho pơhrăm găh bơngai jang; pơm tơdrong hiôk păng hơnơ̆ng đei lơ tơdrong jang tơgŭm ‘lơ̆ng ăn tơpôl 9.000 ‘nu bơngai Việt Nam hơrih sa, hŏk pơhrăm păng bơ̆jang tơ̆ dêh char.