Tơ̆ jơ tơƀâp bơngai tăh hla, Thủ tướng pôk pơ ư plt Cần Thơ păng dôm anih tơm, anih jang kơpal tơlĕch jang ‘lơ̆ng nơ̆r pơtho đơ̆ng Thủ tướng đunh kơ âu hlŏh 2 khei (ƀât Thủ tướng năm tơƀâp bơngai tăh hla Cần Thơ adrol kơ hop akŏm mă 10, Quốc hội jăl XV) găh pơm đang rim hla ar ƀơm truh tơdrong jang Man hnam pơgang Ung bướu Cần Thơ ‘nao, tơplih đơ̆ng jên tŏk iŏk ODA jing iŏk yoa jên đơ̆ng teh đak tơmât jang; atŭm hăm ‘nŏh pơm pơkĕh hla ar răt 2 tŏ kơmăy xạ trị ăn hnam pơgang Ung bướu Cần Thơ hrei ‘nâu.

Pơma hơdăh tơ̆ hơnăp kơnh vă akŏm jơhngâm hơmet pơ ‘lơ̆ng trong pơgơ̆r, pơm ăn dôm tơdrong tơhlăk jing tơdrong ‘lơ̆ng vă sơng iŏk jên jang lơ̆m teh đak păng đơ̆ng teh đak đe, Thủ tướng akhan, rim anih jang chinh trĭ tơ̆ plt, kon pơlei, anih tĕch mơdro athei vang jang, pơjing jơhngâm pran atŭm yoa "Jên jang pơtơm đei đơ̆ng đon tơchĕng păng băt lăng hơtăih, tơdrong ‘lơ̆ng pơtơm đei đơ̆ng đon tơplih ‘nao păng gơ̆h hơgei, jơhngâm pran pơtơm đei đơ̆ng kon pơlei păng anih tĕch mơdro".