Pơma tơ̆ Lêh pơgơ̆r pơih blŭng Jơnŭm kơchơ Pơyan Puih mak, Thủ tướng Phạm Minh Chính chih iŏk, pôk pơ ư păng lăng ‘lơ̆ng Anih tơm vei lăng găh Kơmăy kơmŏk Mơdro sa kŭm hăm dôm anih tơm, anih jang, tơring, tơpôl mơdro sa, lơ lap kon pơlei păng bôl buăl apŭng plĕnh teh hlôi mĭnh jơhngơ̆m đon hơdrin bơ̆jang, vang jang păng pơgơ̆r Jơnŭm kơchơ Pơyan Puih mak ‘măng mă mônh sơnăm 2026 păng pơm pơcheh dôm kơjă kăp gĭt ‘lơ̆ng.

Thủ tướng tơbăt, Jơnŭm kơchơ athei jing hơnih ‘lơ̆ng tơmơ̆t lơ̆m tơmam Việt, roi tơƀôh păng tơbăt hơdăh kơjă hơnăn ‘lơ̆ng kơ Việt Nam, tơƀôh ăn anih dơ̆ng păng tưk tơiung hơnăn Việt Nam păr kơjung, păr hơtăih lĕch tơ̆ apŭng plĕnh teh. Mĭnh tơmam drăm athei jing 1 tơmam tang măt ăn joh ayŏ, mĭnh kơdeng tơmam athei jing 1 hơnih roi tơƀôh rum ƀôh um rup Việt Nam hơbĕch hơbal, lui leh, rơngei, sơđơ̆ng păng hơtŏk tơiung.