Pơgê 8/12, tơ̆ tơring sơlam dêh char Tây Ninh păng dêh char Prey Veng (teh đak Campuchia), Thủ tướng Phạm Minh Chính păng Thủ tướng Campuchia Hunmanet vang pơgơ̆r Lêh et hơtŏk 2 tŏ ‘măng jang sơlam apŭng plĕnh teh Tân Nam – Meun Chey. Pơma tơ̆ jơ pơm lêh, Thủ tướng Phạm Minh Chính pơma hơdăh 2 tŏ ‘măng sơlam apŭng plĕnh teh Tân Nam – Meun Chey pơih ăn “tơnang ‘măng mơdro so” ‘nao, tơgop hơtŏk loi dơ̆ng tơgoăt mŭk drăm, tĕch mơdro, tơmang lăng păng tơƀơ̆p băl kon pơlei 2 teh đak, hơdai hăm hơmet ming tơdrong tơbôl, jang hơdai đunh đai.

Thủ tướng pơma hơdăh Việt Nam păng Campuchia jing 2 teh đak tơ jê̆ băl, đei hơdai thong đak Mê Công, hơtŏk tơdrong pơvei tơ jê̆ ‘lơ̆ng hơiă, tơbôl joăt joe, jang hơdai tôm tơdrong, kơjăp đunh đai” prăt vă jê̆ 20 sơnăm âu ki. Tơdrong jang ‘măng jang apŭng plĕnh teh tơ ter trong sơlam đei hơnăp jang gĭt kăl lơ̆m hơtŏk tơiung mŭk drăm tơring. Jên tĕch mơdro 2 pang dôm sơnăm tơ jê̆ âu pơvei dang 10 ti USD lơ̆m 1 sơnăm păng tơchĕng hơdrol sơnăm 2025 rŏ lăng gô iŏk đei 12 ti USD.