Kơsơ̆ 23/12, tơ̆ Anih jang kơ Khul kơdră teh đak, Thủ tướng Phạm Minh Chính pơgơ̆r hop akŏm Khul kơdră chĕp kơ̆l teh đak tơgop nơ̆r, hơlen năng, hơmet ming dôm tơdrong pơmat tat ăn dôm tơdrong jang pơm trong gre treng tơm. ‘Nŏh jĭ dôm trong gre treng: Lào Cai – Hà Nội – Hải Phòng, trong gre treng kơdâu hrĕnh Bắc – Nam păng dôm trong gre treng lơ̆m tơring kơdrâm tơ̆ Hà Nội, plt Hồ Chí Minh.

Pơma pơtôch hop akŏm, Thủ tướng akhan, dôm anih tơm, anih jang kơpal, tơring tơrang hlôi adrin vang jang, tơlĕch lơ tơdrong jang gĭt kăl lơ̆m sơnăm 2025, mă loi ‘nŏh tơdrong hơmet ming Luơ̆t trong gre treng, hơmet pơ keh trong pơgơ̆r, tơdrong tơgŭm vă hơtŏk tơdrong jang ming man. Thủ tướng athei Anih tơm jang Khoa hŏk păng kơmăy kơmŏk, Anih tơm vei lăng ming man hơlen năng rim tơdrong hơgăt đơ̆ng apŭng plenh teh, rơih iŏk kơmăy kơmŏk mă lăp ăn trong gre treng kơdâu hrĕnh, pơm ‘lơ̆ng, đei yoa găh ki thuơ̆t, mŭk drăm, jang tơbôl. Hăm tơdrong jang Lào Cai – Hà Nội – Hải Phòng, athei ‘moi kiơ̆ khei ‘năr hơgăt, adrin jang đang hơyak blŭng a hiơ̆ hlŏh ‘nŏh lơ̆m khei 3/2026; atŭm hăm ‘nŏh hơtŏk hrĕnh tơdrong jang pơm trong hơla tơring kơdrâm tơ̆ Hà Nội, plt Hồ Chí Minh.