Tơ̆ ‘măng hop akŏm, dôm anih tơm, anih jang tơƀôh hơdăh đon pơhnŏng jang hơdai kơjăp hăm Khŭl kơdră teh đak lơ̆m vei lăng mŭk drăm sơnăm 2026 păng jăl jang đơ̆ng rŏng dơ̆ng. Tơlĕch jang tơdrong Tơchơ̆t 01, 02 đơ̆ng Khŭl kơdră teh đak, dôm anih tơm hlôi tơlĕch ăn tơdrong jang hăm hơdrin ‘lơ̆ng hloh tơdrong hơgăt đei pơjao, klăih song hơnăp jang hơdăh ăn rim kơdră chĕp kơ̆l anih jang.

Pơma pơtôch, Thủ tướng pơma hơdăh athei pơm ‘nao dôm tơdrong jang tưk tơiung jang tŏk joăt joe, hơdai hăm pơtrŭt jang tŏk ‘nao hăm jơhngơ̆m đon pơ̆n tơchĕng, pơ̆n jang, pơ̆n pŭ hơnăp jang. Thủ tướng athei tơlĕch jang tơdrong Hơgăt Hop akŏm XIV kơ Đảng iŏk đơ̆ng blŭng sơnăm 2026; bơ̆jang kiơ̆ ‘mơ ‘met 10% jên pơhoach hơnơ̆ng, 5% tơmơ̆t jên jang hơtŏk tơiung vă ‘măn jên ăn trong gre treng Lào Cai – Hà Nội – Hải Phòng, hơdai hăm tơgŭm hơdrol hơtŏk jên iŏk ăn khŭl lĭnh, tơmơ̆t jên jang hơtŏk tơiung păng vei sơđơ̆ng tơdrong hơrih sa tơpôl.