‘Năr dơ̆ng 22/12, tơ̆ Anih bơ̆jang kơ Khŭl kơdră teh đak, Thủ tướng teh đak hlôi pơjao hla ar Tơchơ̆t ăn ƀok Lê Mạnh Hùng, Kơdră vei lăng Jơnŭm jang lơ̆m Grŭp jang Đak dâu Việt Nam (Petrovietnam) năm bơ̆jang tơ̆ Anih tơm vei lăng găh Kơmăy kơmŏk Mơdro sa păng pơjao pơm Kơdră pơgia Anih tơm vei lăng găh Kơmăy kơmŏk Mơdro sa. Hơdrol ‘noh, ƀok Lê Mạnh Hùng hlôi bơ̆jang tơ̆ Hơnih pơvih ăn Khŭl kơdră teh đak iŏk jang lơ kơchư̆k chĕp kơ̆l lơ̆m anih jang đak dâu.

Kiơ̆ lơ̆m kơchư̆k pơm Kơdră Jơnŭm jang lơ̆m Petrovietnam, ƀok hlôi hơdai hăm đĭ đăng kơdră chĕp kơ̆l sơđơ̆ng pơgơ̆r, hơmet pơ ‘lơ̆ng lơ tơdrong oei đei, hơnhăk Grŭp jang hơtŏk tơiung pran, vang jang jrŭ să hloh lơ̆m trong jang kơjă kăp gĭt jơ̆p plei teh. Thủ tướng pơma hơdăh tơdrong pơjao hơnăp jang Kơdră tơm pơgia tơƀôh tơdrong lui ngeh, hơmĕng tih đơ̆ng Đảng, teh đak hăm kơdih ƀok Lê Mạnh Hùng, hơdai hăm jing athei hơnơ̆ng tơplih ‘nao, hơtŏk tơiung pran kơtang anih jang kơmăy kơmŏk mơdro sa, tơgop lơ̆m tơdrong hơtŏk tơiung atŭm kơ teh đak lơ̆m jăl jang ‘nao.