Năr 17/12, tơ̆ Hơnih bơ̆ jang Khul kơdră chĕp pơgơ̆r Teh đak, Thủ tướng Phạm Minh Chính pơm tơm ‘măng hop akŏm hơlen tơlĕch jang kiơ̆ tơdrong jang “Iung jang Quang Trung” tơgŭm kon pơlei hơmet pơ ‘lơ̆ng đơ̆ng rŏng ‘mi kial pơrăm, đei pơdăh kơtă truh hăm rim dêh char, pơlei tơm đơ̆ng Hà Tĩnh truh tơ̆ Lâm Đồng. Hloh đơ̆ng dăr lăng hơlen, hnam kăl ming man ‘nao hơnơ̆ng tŏk lơ, dang ei hlôi đei truh 1.622 tŏ hnam đei ming man, tŏk 651 pơbŭng hnam pơtêng hăm tơbăt hơdrol kơ ‘noh. Hôn bơnê rim dêh char nhen Đắk Lắk, Gia Lai, Đà Nẵng iung jang ‘lơ̆ng kơtang tơlĕch jang lơ̆m khei năr ou ki, Thủ tướng pơma hơdăh trong jang “Iung jang Quang Trung” ưh kơ đei jơva ƀrơ̆m phao mă lei kăl iŏk đei jơnei keh kong, pơjing đei jơhngơ̆m đon lui yom ăn kon pơlei hrôih sơđơ̆ng hơrih sa. Trong tơlĕch ăn ‘noh jang keh đang đĭ đăng hnam ming hơmet hơdrol kơ năr 31/12/2025 păng ming man hnam ‘nao keh đang hơdrol kơ năr 31/1/2026. Thủ tướng athei rim tơring, mă kăl hloh ‘noh Gia Lai păng Đắk Lắk, hơnơ̆ng iung jang kơtang hloh dơ̆ng; adoi pơjao ăn Hơnih tơm Kŏng ang, Hơnih tơm Ƀô̆ đô̆i, Đoàn Hơdruh tơdăm tơgum djru khul jang, atŏk kơtang jơhngơ̆m đon đĭ jơhngơ̆m đon tơgum djru kon pơlei vă kon pơlei hrôih đei tơdrong hơrih sa, oei sa sơđơ̆ng.