Thủ tướng tơchĕng ‘lơ̆ng dôm tơdrong tơgop đơ̆ng dôm Bơngai tang măt păng Anih jang tang măt vang pơm hơtŏk tơdrong pơvei đơ̆ng Việt Nam hăm dôm teh đak ASEAN. Thủ tướng pơma hơdăh, Việt Nam ling lang năng kăl păng pơ ‘nhŏ hơdrol tơdrong tơgŭm ăn tơdrong pơvei hăm dôm teh đak tơjê̆; pơkăp hơnơ̆ng vang bơ̆ jang, vang tơgop roi kơchăng, đei yoa hlŏh dơ̆ng ăn tơdrong jang hơdoi lơ̆m ASEAN. Thủ tướng athei dôm bơngai tang măt, Kơdră Anih jang tang măt hơnơ̆ng tơgop mă 'lơ̆ng ăn tơdrong jang tŏk pran lơ̆m tơdrong pơvei đơ̆ng Việt Nam hăm dôm teh đak ASEAN tơ̆ hơnăp kơnh.

Athei ASEAN adrin pơm pơ 'lơ̆ng hlŏh dơ̆ng tơdrong pơvei, tĕch mơdro - tơmât jên jang lơ̆m Grŭp, iŏk yoa 'lơ̆ng rim tơdrong pran vă jang tŏk 'nao nhen jang mŭk drăm kơsô̆, jang khoa hŏk kơmăy kơmŏk, tơplih 'nao rơgei, hơtŏk tơdrong jang hơdoi lơ̆m dôm tơdrong gĭt kăl nhen man anih jang, pơm trong, jang unh hơyuh...; hơmet kơjăp tơdrong pơvei 'lơ̆ng hơiă đơ̆ng sơ̆, hơtŏk tơdrong pơvei đơ̆ng kon pơlei; pơjing Tơpôl ASEAN pran kơjăp, iŏk tơdrong đei yoa đơ̆ng kon pơlei pơm 'long pơtŏ ăn rim tơdrong tơgŭm, tơdrong jang hơdai.