Unh hnam pơmai H’Unh Hmok tơ̆ pơlei Tul A, xah Ea Wer, dêh char Đăk Lăk noh unh hnam hin dơnuh. Tơdrong hơrih tơnap tap pơm ăn tơdrong hŏk pơhrăm kon hơ-ioh ah rim sơnăm hŏk 'nao ưh đei ƀônh hiôk ôh. Lơ sơnăm kơ ou, bơngai pơtho tơ̆ hnam trưng Jăl kơđeh Nguyễn Du hơnơ̆ng tơrĕk tơgŭm ăn unh hnam dôm tơmam drăm kăl vă đe kon pơmai H’Unh pơtoi đei năm hŏk pơhrăm:  “Đei thâi kô tơgŭm, mă tơnap tap dang yơ kŭm ăn kon hơ-ioh năm hŏk. Đe kon ưh đei 'long chih, ưh đei hla bơ-ar hŏk 'noh inh tơroi hăm thâi kô. Mưh kĕ đei noh đe thâi kô tơgŭm ăn kơ ba mă 'noh”

Hnam trưng Jăl kơ đeh Nguyễn Du, xah Ea Wer, dêh char Đăk Lăk đei hloh 85% hŏk tro kon kông, lơ̆m noh đei lơ hơ-ioh tơnap tap. Vă pơtoi vei sơđơ̆ng kơsô̆ hŏk tro, hnam trưng sơkơ̆t hơdah athei băt hơdah tơdrong hơrih kơ rim unh hnam păng kơchăng hơvơn hŏk tro truh tơ̆ lăm. Kô pơtho H’Thong Thíp tơroi, đơ̆ng blŭng khei 8, atŭm hăm tơroi kiơ̆ mạng tơpôl Zalo, Facebook, bơngai pơtho truh rim hnam, mă kăl noh hăm dôm unh hnam tơnap kơ băt tơroi, truh chă hơvơn mĕ ƀă 'nhăk kon năm hŏk tơ̆ trưng: “Mă hlôi tơroi lơ̆m Zalo, Facebook, mă lei tơ̆ ou mă lơ noh bơngai kon kông noh mĕ ƀă ưh đei pơngơ̆t dêh ôh. Dôm unh hnam ưh đei yua mạng tơpôl noh ưh kơ băt hơdah, bơngai pơtho kon kông tơ̆ tơring truh rim hnam vă chă hơvơn mĕ ƀă nôp hô sơ, atŭm hăm noh tơroi khei năr hŏk, hơnih hŏk vă đe oh gơh năm truh hnam trưng”

'Nhăk hŏk tro năm hŏk tơ̆ hnam trưng noh tơnap bơih, vă đe oh sơđơ̆ng jơhngơ̆m hŏk pơhrăm 'noh kăl đei chă tơgŭm gah hla bar hŏk, hơbăn ao păng tơmam drăm hŏk pơhrăm. Kơyuơ noh, đe thâi kô pơtho tơ̆ Đăk Lăk hơnơ̆ng chă hơvơn rim hơnih jang, bơngai jang atŭm chă tơgŭm ăn đe hŏk tro tơnap tap. Gơnơm noh, lơ hnam trưng tơ̆ tơring hơtaih yaih, tơring tơnap tap oei đei tôm 100% hŏk tro truh tơ̆ lăm kiơ̆ tơchơ̆t păng ưh đei hŏk tro lê̆ hŏk.

Kô pơtho Đỗ Thị Xuân, Kơdră Hnam trưng Jăl kơđeh Nguyễn Du (xah Ea Wer), tơroi, hơdrol kơ sơnăm hŏk 'nao, lơ tơmam asong pơtoi đei pơtruh ăn đe hŏk tro tơnap tap, vă tơgŭm ăn đe oh đei jơhngơ̆m truh hŏk tơ̆ lăm: “Đei 2 hơnih jang, bơngai jang gah tơgŭm ăn hnam trưng. Mă mônh 'noh hơvơn akŏm hla bơ-ar hŏk, tơmam pơtho pơhrăm asong ăn đe oh lơ̆m unh hnam hin dơnuh păng đe oh tơnap tap. Păng pơtơm sơnăm hŏk 'nao noh hnam trưng kŭm hơvơn đei hơnih jang 'mêm bơnat chă tơgŭm ăn hnam trưng đei 170 blah hơbăn ao, kơdŭng 'măn hla bơ-ar hŏk ăn kơ đe hŏk tro hin dơnuh păng tơnap tap”

Sơnăm hŏk 2026-2027, Hnam trưng hŏk oei hơdoi Jăl kơđeh – Trung hŏk kơ sơ Buôn Đôn, dêh char Đăk Lăk pơtơm sơnăm hŏk mă blŭng kiơ̆ pơkăp hnam trưng teh đak rong 'me lơ jăl, hăm hloh 40 lăm hŏk păng hloh 1.100 hŏk tro. Mă hnam trưng lăm hŏk đei ming man 'lơ̆ng, minh ƀar hŏk tro lăm 1 truh lăm 3 tơ̆ pơlei Drang Phôk adoi oei ƀơm tơnap tap ah năm truh hnam trưng 'nao, kơlih hơtaih đơ̆ng hnam truh tơ̆ hnam trưng đơ̆ng 15 truh hloh 20 km. Ƀok Thái Văn Lộc, Kơdră Hnam trưng tơroi gah tơdrong đei, nơ̆r pơtruh đơ̆ng mĕ ƀă hŏk tro, hnam trưng tŏk bŏk oei tơlĕch trong jang tơgŭm gre chơ đe hŏk tro bô̆k vih: “Hnam trưng adoi pơtruh nơ̆r hăm Hơnih jang vei lăng kon pơlei xah, pơtruh nơ̆r hăm dêh char apinh jên vă răt gre chơ hŏk tro năm hŏk păng vih: ah pơgê đơ̆ng pơlei Drang Phôk păng ah kơsơ̆ đơ̆ng hnam trưng vih, vă đe kon gơh đei hŏk pơhrăm sơđơ̆ng 'lơ̆ng, păng đei tôm tơdrong jang vă vei lăng đe hơ-ioh gơh 'lơ̆ng hloh"

Dôm tơdrong tơroi tơ̆ dôm hnam trưng tơnap tap ăn ƀôh, tơdrong tơhlăk truh hnam trưng ưh hơdrô̆ oei lơ̆m mŭk drăm mă oei trong hơtaih gah teh, tơdrong băt kơtơ̆ng ang păng tơdrong hơrih kơ rim unh hnam. Kơyuơ noh, hơmet ăn sơnăm hŏk 'nao athei pơtơm đơ̆ng tơdrong băt hơdah trŏ rim tơdrong tơnap tap vă đei trong tơlĕch jang mă trŏ ƀlep.

Ƀok Lương Nguyễn Minh Triết, jang lơ̆m Trung ương Đảng, Bĭ thư Tĭnh uy Đăk Lăk pơgơ̆r hăm rim tơring vei sơđơ̆ng 'lơ̆ng hnam trưng lăm hŏk, bơngai pơtho, hla bơ-ar hŏk păng dôm tơdrong kăl ăn tơdrong hŏk pơhrăm, mă kăl noh tơ̆ tơring hơtaih yaih, tơring kon pơlei kon kông, tơring sơlam:  “Vei tôm mah hnam trưng, lăm hŏk, hla bơ-ar hŏk, tơmam drăm pơtho pơhrăm păng dôm tơdrong kăl nai ăn sơnăm hŏk 'nao. Pơtoi hơlen lăng tơdrong 'lơ̆ng gah pơtho pơhrăm; đei trong pơm jang hơdah vă hơtŏk 'lơ̆ng tơdrong pơtho păng hŏk tơ̆ tơring kon kông, tơring hơtaih yaih, tơring sơlam; vă pơm kơđeh ƀiơ̆ tơdrong ưh đei hơtŏ dih băl kơ rim tơring; tơjur ƀiơ̆ kơsô̆ hŏk tro lê̆ hŏk, pơkăp ưh đei hŏk tro lê̆ hŏk kơyuơ tơdrong hơrih tơnap tap”.

Đơ̆ng hla bơ-ar hŏk, hơbăn ao truh hloi gre chơ brŏk năm, dôm tơdrong tơgŭm tơpă ăn hŏk tro tơring tơnap tap Đăk Lăk hiôk hian hloh năm hŏk pơhrăm, Đơ̆ng rŏng kơ tơdrong hơmet ăn minh sơnăm hŏk 'nao ưh hơdrô̆ jĭ dôm bơbŭng hnam trưng oei đei ming hơmet, mă oei jing tơdrong hơdrin vă ưh đei hŏk tro ayơ athei lê̆ hŏk kơlih tơdrong hơrih tơnap tap dah mă hnam oei tôch hơtaih hăm hnam trưng.