Hăm hloh  400 hlak, kơsơ̆p săch rơih đei  51 ƀai chih, ƀai pơre lơ̆m kơsô̆ kơhrĕng ƀai chih đơ̆ng Đại tướng Lương Cường lơ̆m khei năr oei jang kơdră dơnơm lơ̆m Đảng păng teh đak. Săch chih tơroi gah đon tơchĕng, trong pơm jang đơ̆ng Ƀok hăm dôm tơdrong jang kăl kơ teh đak.

Săch đei in tơbang lơ̆m khei năr tôm Đảng, tôm kon pơlei, tôm khul linh tŏk bŏk oei akŏm pơm kiơ̆ Tơchơ̆t Hop akŏm mă 14 kơ Đảng, gô tơgop pơlan să dôm tơdrong kăp gĭt 'lơ̆ng rŏ kơ kăch mạng Việt Nam, hơtŏk đon 'mêm kơ teh đak, tơdrong hơpơi 'meh plang jơhngơ̆m pran tơguăt tơguăl tôm kon pơlei lơ̆m tơdrong jang tơ-iung pơjing păng vei lăng teh đak lơ̆m chăl sơnăm hơtŏk tơ-iung 'nao.