Tơ̆ jơ sơng, Thủ tướng ră hơdah, Việt Nam hơnơ̆ng lăng tơgĭt păng hơpơi 'meh hơtŏk hơnơ̆ng tơdrong jang tơbôl juăt jue hăm Hơnih jang hơdoi tôm tơdrong hăm Liên bang Nga. Thủ tướng bơnê kơ tơdrong mă Hơnih jang hlôi hơtŏk tenh kuăng păng tơtom pơm jang hăm dôm hơnih jang mŭk drăm pran kơ teh đak Việt Nam lơ̆m khei năr ou ki; pơtruh nơ̆r hăm hơnih jang asong jang lơ hloh dơ̆ng tơ̆ Việt Nam, rim hơnih jang mŭk drăm 2 pah jang hơdoi kơjăp, đei jơnei hloh dơ̆ng vă pơm kiơ̆ dôm tơchơ̆t pơdrơ̆ng đơ̆ng khul kơdră kơpal.

Bơnê kơ Thủ tướng Phạm Minh Chính 'măn jơ sơng, ƀok Vladimir Petrovich Evtushenkov ăn tơbăt, AFK Sistema jĭ hơnih jang tih hloh kơ Liên bang Nga hăm pơhlom 300 rơbou bơngai jang mŭk drăm gah lơ tơdrong jang: Viê̆n thŏng, jang gah kơmăi kơsô̆, kơmăi kơmŏk 'nao hơgei, tĕch pơdro kiơ̆ điê̆n tư, jang pơgang hơmet jĭ jăn, kŏng ngĭp tơ̆r păng pơm hnam tơ̆r, choh jang xa, pơm pơgang, hơnih oei xa pơdơh pơdei... Ƀok sơkơ̆t hơdah gô hơdrin hơtŏk jang hơdoi hăm Việt Nam lơ̆m dôm tơdrong jang mă Thủ tướng hlôi pơgơ̆r; kơchăng pơtho kăp gĭt ăn bơngai jang Việt Nam vă pơyua tơnăp hloh păng đunh đai ăn pơđĭ 2 pah.