Chơt hơ-iă đei tơƀơ̆p dơ̆ng ƀok Klaus Zellmer, đơ̆ng rŏng kơ tơdrong năm pơm jang ah khei 1 ou ki ƀơ̆t 'măng Thủ tướng teh đak bơ̆n năm tơmang teh đak Czech, Thủ tướng Phạm Minh Chính thơ thou hơ-iă hăm Hnam kơmăi pơm gre hơyuh Thành Công Việt Hưng đei tơmơ̆t pơm jang, pơm gru kơnăl hơtŏk hơdah lơ̆m tơdrong jang hadoi đơ̆ng Việt Nam păng Cộng hòa Czech, mă kăl noh ah 2 teh đak drơ̆ng nơ̆r hơtŏk tơbôl jang Hơdoi tôm tơdrong.

Sơkơ̆t hơdah Jơnŭm pơgơ̆r teh đak Việt Nam pơkăp hơnơ̆ng yak hadoi hăm anih jang mŭk drăm, vei sơđơ̆ng ăn dôm anih jang mŭk drăm pơm jang tĕch pơdro trŏ luơ̆t pơkăp, jang 'lơ̆ng đei jơnei; kơchăng tơmơ̆ng dôm nơ̆r tơgop, hơtŏk tơdrong hlôh vao dih băl, hơtŏk jang hadoi đei jơnei, Thủ tướng Phạm Minh Chính pơtruh nơ̆r hăm Anih jang Skoda Auto hơtŏk pơih să asong jang tĕch pơdro păng jang hadoi hăm dôm anih jang mŭk drăm Việt Nam lơ̆m tơdrong jang pơm tơlĕch gre hơyuh; hơtŏk tơdrong jang kŏng ngĭp pơm tơlĕch gre hơyuh Việt Nam.