Tơ̆ jơ sơng, Thủ tướng teh đak bơ̆n răh hơdah, lơ̆m khei năr tơring păng apŭng plenh teh đei lơ tơsŭl tơsăl nhen dang ei, tơdrong tơguăt tơguăl, tơbôl juăt jue păng jang hơdoi tôm tơdrong kơ 2 teh đak jing tơdrong tơm vă 2 hơdrung hơdrĕch atŭm vei sơđơ̆ng hiôk hian, iŏk yua tơdrong pơjing mŭk drăm pơgơ̆r kơdih atŭm tơguăt vă hơtŏk tơ-iung kơjăp sơđơ̆ng. Ƀar kơdră ƀôh hơdah tơdrong tơbôl Việt Nam - Campuchia pơtoi hơtŏk 'lơ̆ng rŏ lơ̆m tôm tơdrong.

Tơdrong tơbôl chinh trĭ - jang tơbôl pơtoi đei hơtŏk, tơƀôh kiơ̆ tơdrong 2 pah hơnơ̆ng asong khul kơpal pơma đam hăm dih băl. Jang hơdoi gah khul linh vei sơđơ̆ng tơpôl pơtoi jing sơnong jang tơm. Jang hơdoi gah mŭk drăm jing hơnih hơdah hăm tơmam tĕch răt kơ 2 pah tŏk kơjung. Jang hơdoi gah pơtho pơhrăm, joh ayŏ, tơmang pơhiơ̆, hơpeh hơpong kon pơlei đei tơrĕk hơtŏk.