Tơ̆ jơ tơƀơ̆p, Thủ tướng pơma hơdăh, lơ̆m ‘măng iung năm tơmang teh đak Nga păng vang Pơm lêh tơbăt 80 sơnăm Năr Jơnei lơ̆m ‘Măng iung tơblăh vei lăng teh đak gĭt kăl đơ̆ng Tổng Bí thư Tô Lâm (khei 5/2025), Kơdră chĕp kơ̆l tơm dơnơm kơ ƀar teh đak  hlôi iŏk đei drơng mĭnh nơ̆r păng kơrŭn đĭ ai pơm hơtŏk kơtang hloh dơ̆ng tơgoăt tơgoăl jang hơdoi tôm tong ƀar păh vang đei iŏk yoa sa hơpăh hơdoi lơ̆m rim tơdrong, trŏ lăp hăm dôm tơdrong pơkoel lơ̆m chăl atŏk tơ iung ‘nao. Thủ tướng lui akhan, lơ̆m khei năr kơnh, Cộng hòa Tatarstan gô tơchă đei tơring trŏ lăp tơ̆ Việt Nam vă pơjing tơbôl, tơchă rơvơn jang hơdoi lơ̆m dôm tơdrong mă ƀar păh kĕ jang, đei păng ‘meh vă nhen mŭk drăm-mơdro sa, pơtho pơhrăm, tơmang pơhiơ̆, joh ayŏ. Adoi pơtrŭt rim kŏng ty gre păr chơ tơmoi ƀar teh đak lăng ba kơjăp atŏk tơ iung dơng trong păr mơdro sa kloh klĕch dih băl Kazan hăm Hà Nội.