Tơ̆ hop akŏm, rim bơngai tang măt hlôi pơma đam gah dôm tơdrong tŏk bŏk oei đei tơlĕch vă pơrô̆ pơrôp kon pơlei, pơjing hơnih dơ̆ng kơjăp “lơ̆m đon bơnôh kon pơlei” păng tơdrong tơlĕch jang gah linh, vei lăng teh đak lơ̆m trong jang 'nao. Đe kră pơlei, kơdră thôn, pơlei, bơngai đei kon pơlei lui yom, bơngai pơtho tơdrong lui jang rơgei jĭ “bơngai gĭt tơguăt tơguăl” lơ̆m tơpôl păng jĭ gơng tơroh kơjăp đơ̆ng Đảng, jơnŭm pơgơ̆r tơring, khul linh hăm kon pơlei. Đại tướng Nguyễn Trọng Nghĩa pôk bơnê kơ dôm tơdrong tơgop kăp gĭt đơ̆ng Đe kră pơlei, kơdră thôn, pơlei, bơngai đei kon pơlei lui yom, bơngai pơtho tơdrong lui jang rơgei lơ̆m khei năr ou ki.

Đại tướng sơkơ̆t hơdah trong pơkăp jang đơ̆ng Đảng, Teh đak păng Khul linh: kon pơlei hơnơ̆ng jĭ hơnih tơm, jĭ tơ-'ngla kơ rim trong tơlĕch jang păng jing jơhngơ̆m pran tơchơ̆t tơdrong tơplih 'nao, hơtŏk tơ-iung teh đak. Đại tướng hơpơi 'meh lơ̆m khei năr truh, đe kră pơlei, kơdră thôn, pơlei, bơngai đei kon pơlei lui yom, bơngai pơtho tơdrong lui pơtoi iŏk yua tơdrong tơnăp noh, yak hơdoi hăm Khul linh păng jơnŭm pơgơ̆r tơring vă atŭm vei lăng tơdrong hơrih, pơtho kon hơ-ioh, vei sơđơ̆ng pơlei pơla, pơjing hơnih tơm ăn tơdrong hơtŏk tơ-iung kơjăp sơđơ̆ng kơ Tây Nguyên.