Hơdrol kơ noh, ah 'năr brei (22/1) Hop akŏm 14 kơ Đảng hlôi tơbang tơdrong đei jơnei kơ 'măng pôk rơih păng tơchơ̆t hơnăn dôm bơngai đei pôk jang lơ̆m Ƀan châ̆p hanh Trung ương Đảng jăl 14.

Kiơ̆ hla bar tơroi, lơ̆m năr pơm jang mă 4, Hop akŏm hlôi pơm jang prăt năr vă pơma đam păng pơm kiơ̆ dôm tơdrong kăl gah asong bơngai jang lơ̆m Ƀan châ̆p hanh Trung ương Đảng jăl 14. Tổng Bí thư Tô Lâm tang măt ăn Khul Kơdră pơgơ̆r tơdrong hop akŏm. Ƀok Lê Minh Hưng, jang lơ̆m Hơnih tơm Chinh trĭ, Ƀĭ thư Trung ương Đảng, Kơdră Hơnih pơgơ̆r jang Trung ương tang măt ăn Khul Kơdră đŏk tơbang Hla bar kăp gĭt kơ Ƀan châ̆p hanh Trung ương Đảng jăl 14 gah tơdrong asong bơngai jang lơ̆m Ƀan châ̆p hanh Trung ương Đảng jăl 14.  

Hop akŏm hlôi tơlĕch pơma đam păng drơ̆ng nơ̆r tơchơ̆t kơsô̆ Bơngai jang lơ̆m Ƀan châ̆p hanh Trung ương Đảng jăl 14 noh 200 đŏng chĭ, đei 180 đŏng chĭ Jang tơm păng 20 đŏng chĭ jang hơmŏ. Rim bơngai tang măt hơlen lăng, pơma đam gah Hla bar kăp gĭt chih tơbang asong bơngai jang lơ̆m Ƀan châ̆p hanh Trung ương Đảng jăl 14; lĕch măt tơgar, đe pôk păng hơlen dôm hla bar chih akŏm, hô sơ bơngai jang.

Khul Kơdră tơmơ̆ng rim kơdră khul tơroi gah tơdrong akŏm đei đơ̆ng pơma đam kơ Khul tang măt hăm Hla bar kăp gĭt chih tơbang asong bơngai jang lơ̆m Ƀan châ̆p hanh Trung ương Đảng jăl 14; lĕch măt tơgar, đe pôk, dôm bơngai apinh sut măt đơ̆ng hơnăn lĕch măt tơgar, chih tơmơ̆t lơ̆m hơnăn pôk rơih. Khul Kơdră tơroi hăm Hop akŏm păng drơ̆ng nơ̆r hơlen hơnăn pôk rơih jang lơ̆m Ƀan châ̆p hanh Trung ương Đảng jăl 14; pôk Jơnŭm hơlen kơphĭu; Jơnŭm hơlen kơphĭu pơtho tơdrong jang pôk rơih.  

Hop akŏm pơtơm chih kơphĭu, tah kơphĭu, tơbang tơdrong akŏm đei păng hơlen hơnăn dôm đŏng chĭ đei pôk jang lơ̆m Ƀan châ̆p hanh Trung ương Đảng jăl 14.