Đơ̆ng Hop akŏm 13 truh dang ei, lơ̆m khei ‘năr mơmat tat atŭm đơ̆ng mŭk drăm apŭng plĕnh teh, “Yak hloh kial tơhlu hơdrơ̆k”, mŭk drăm Việt Nam oei tŏk tôch kơ lơ păng vei đei jang tŏk sơđơ̆ng ‘lơ̆ng đơ̆ng rŏng jĭ Covid-19. Sơnăm 2023, akŏm jên tĕch tơmam tơ̆ teh đak đe đei vă jê̆ 700 ti đô la Mi; sơng đei tơmơ̆t jên jang đơ̆ng teh đak đe iŏk đei 23 ti đô la Mi, jĭ kơsô̆ lơ hloh đơ̆ng sơ̆ truh dang ei; hơdai hăm, jing 1 hơnih hơdăh găh tơdrong sơđơ̆ng, tơiung ming păng hơtŏk tơiung mŭk drăm lơ̆m khei ‘năr lơ̆m teh đak păng apŭng plĕnh teh tơƀơ̆p lơ mơmat tat, ưh kơ sơđơ̆ng. Sơnăm 2024, GDP hlôi iŏk đei hloh 476,3 ti USD (tŏk vă jê̆ 60 ‘măng pơting hăm sơnăm blŭng tơplih ‘nao), jing mŭk drăm tih mă 4 kơ ASEAN păng mă 32 kơ apŭng plĕnh teh. Pơma tơ̆ Hop akŏm Bơngai mơdro sa sơnăm mơlôh Việt Nam ‘măng mă VIII ‘nao âu, Thủ tướng Phạm Minh Chính tơroi rơđăh:

“Đơ̆ng rŏng vă jê̆ 40 sơnăm tơplih ‘nao mŭk drăm Việt Nam đĭ tŏk lơ. Tơdăh đĭ sơnăm 2025 tŏk đei hloh 8%, akŏm lơ đơ̆ng mŭk drăm  510 ti USD, dơ̆ng mă 32 lơ̆m apŭng plĕnh teh. Jô̆ păh lăp kơ̆l bơngai đei hloh 5.000 USD. Thoi noh, teh đak bơ̆n yak mơ̆t lơ̆m teh đak iŏk yua jô̆ păh lăp lơ (jô̆ păh lăp lơ dang 4.700 mă Việt Nam hloh 5.000). ‘Nâu jĭ 1 jơnei atŭm đơ̆ng Đảng păng Teh đak bơ̆n”.

Gơh ƀôh, 40 sơnăm bơ̆jang kiơ̆ trong jang Tơplih ‘nao hlôi pơm đei hơyak năm gĭt kăl, hơnhăk teh đak yak hloh tơdrong rơhiŭng rơhiăng, hiơ̆ hơtŏk tơiung vă yak tŏk ‘lơ̆ng păng pran ‘nao. Mŭk drăm tĕch mơdro kiơ̆ trong xã hội chủ nghĩa roi ‘năr roi ‘lơ̆ng, tih păng tơdrong pơjei băl đei hơtŏk rơđăh; jang tŏk pơvei tơ̆ kơsô̆ kơjung lơ̆m lơ jăl jang, tơdrong hơrih sa kon pơlei ưh kơ đei pơdơh đei tơplih ‘lơ̆ng. Tơdrong jang chĭnh trĭ đei hơmet ming, trong jang chĕp kơ̆l đơ̆ng Đảng hơnơ̆ng tơplih ‘nao, ‘lơ̆ng, iŏk yua vei lăng teh đak roi ‘năr roi tŏk, jang tơbôl păng mơ̆t jang hơdai apŭng plĕnh teh iŏk đei dôm jơnei ‘lơ̆ng, hơtŏk ‘lơ̆ng anih dơ̆ng păng bưng ai kơ Việt Nam lơ̆m apŭng plĕnh teh.

Dôm jơnei ‘lơ̆ng gĭt kăl âu jing tơdrong hiôk pơm đei kơjăp vă teh đak yak tŏk, hơdai hăm hơmet ming đon lui đơ̆ng kon pơlei lơ̆m tơdrong chĕp kơ̆l đơ̆ng Đảng, pơtruh tơdrong yan âu gĭt kăl vă Đảng bơ̆n pơjing Hla ar kăl Hop akŏm XIV kiơ̆ trong tơplih ‘nao, hơpơi ‘meh hăm trĕng lăng hơtŏk tơiung ‘nao. Kiơ̆ kơ Tổng Bí thư Tô Lâm, Hop akŏm Đảng lơ̆m teh đak ‘măng mă XIV đei tơdrong ‘lơ̆ng gĭt kăl, tơƀôh hơdăh jăl trong hơtŏk tơiung kơ teh đak bơ̆n, pơih ăn “chăl jang tŏk pơdrŏng pran păng hơnŭk hơnoa”.

Vă bơ̆jang kiơ̆ ‘lơ̆ng dôm trong jang đơ̆ng Đảng, hla ar chih pơtruh ăn Hop akŏm XIV hlôi đei hơmet ăn hơlen, trong vă jang gĭt kăl, gơh hơgei đơ̆ng Đảng păng kon pơlei, tơƀôh tơdrong drơ̆ng nơ̆r kiơ̆ Đảng păng lăp đon Kon pơlei; akŏm tôm dôm tơdrong ‘lơ̆ng vă teh đak yak mơ̆t lơ̆m jăl jang hơtŏk tơiung ‘nao. PGS.TS Nguyễn Trọng Phúc, Học viện Chính trị Quốc gia Hồ Chí Minh akhan:

“Hop akŏm XIV ‘noh jĭ hơyak năm tôch kơ ‘lơ̆ng đơ̆ng Đảng, jĭ tơdrong gĭt kăl kơ jơhnơr hơrih đei tơƀôh tơdrong jang đei ‘lơ̆ng đơ̆ng Đảng, teh đak... mă lei tơdrong pơgơ̆r bơ̆jang kiơ̆ ‘lơ̆ng tơdrong tơchơ̆t đơ̆ng Hop akŏm, jang kiơ̆ ‘lơ̆ng trong jang tih, dôm nơ̆r athei gĭt kăl đơ̆ng hop akŏm, tơdrong hơgăt tih đơ̆ng chăl ‘nao.... Athei vă bơ̆jang kiơ̆ ‘lơ̆ng thoi yơ ‘noh jing tơdrong gĭt kăl hloh. Rim tơdrong hơtŏk tơiung kơ teh đak đơ̆ng rŏng Hop akŏm XIV ‘noh pơmơ̆ng lơ̆m tơdrong chĕp kơ̆l, pơgơ̆r đơ̆ng Trung ương, Anih tơm Chĭnh trĭ, khŭl jang chĭnh trĭ lơ̆m jăl jang ‘nao”.

Hăm hơnăn "Hơla hla kơ ang hơdăh kơ Đảng, mĭnh jơhngơ̆m đon bơ̆jang kiơ̆ jơnei dôm tơdrong hơgăt hơtŏk tơiung teh đak truh sơnăm 2030; pơm tơm kơdih bơ̆jang, hơdrin kơdih, lui ngeh, năm pran lơ̆m chăl jang tŏk đơ̆ng hơdrĕch hơdrŭng, yua kơ tơdrong rơngei, hiôk hian, kon pơlei pơm tơm, pơdrŏng pran, hơnŭk hơnoa, hơgei, hiôk chơt, kơjăp yak năm tŏk chủ nghĩa xã hội", Hop akŏm Đảng lơ̆m teh đak ‘măng mă XIV jing tơdrong pơtrơp păng hơtŏk dôm jơnei hlôi iŏk đei đơ̆ng 40 sơnăm tơplih ‘nao; jing tơdrong gĭt kăl lơ̆m tơdrong jang yak truh 1 teh đak hơtŏk tơiung, hơnŭk hơnoa păng pran kơtang.