Anih Trung ương MTTQ Việt Nam jang hơdoi hăm Công ty tơm Ƀier – Alăk – Đak ‘ngam Sài Gòn (SABECO) pơgơ̆r tơdrong jang “Hơdai tơmam Têt Việt – Tơguăt rim tơring” tơ̆ xăh Kim Bảng, dêh char Nghệ An. Anih pơgơ̆r hơpăh 500 tơpu tơmam Têt, 1 tơpu đei kơjă 900 rơbâu hlak jên đei tơmam xa, jên măt, tơgŭm ăn dôm unh hnam  tơnuh, vă jê̆ tơnuh tơ̆ tơring.

Tơdrong jang oei pơgơ̆r hloi hơri hơxoang, ngôi pơchơt nhen pai tơmam xa, pơdă tơmam Têt tơring Nghệ, thi pơm ƀĕng chưng, ngôi pơchơt kră sơ̆, sơng đei lơ kon pơlei truh. Ƀlep ƀât ‘măng mă  âu, anih pơgơ̆r năm ngôi păng hơpăh 20 triu hlak jên ăn kăn ƀô̆, linh tơ̆ Kơđông sơlam 561 ‘Măng jang sơlam Thanh Thủy, pơlung đe linh bơ̆ jang vei lăng ‘lơ̆ng tơring sơlam. ‘Nâu jĭ 1 lơ̆m dôm tơdrong jang vă hơpăh 6.500 tơpu tơmam Têt tơ̆ 16 dêh char, plt lơ̆m teh đak.