Lăp đơ̆ng blŭng jăl jang jăl 13, Anih tơm Chĭnh trĭ hlôi tơlĕch ăn tơdrong hơgăt găh tơdrong jang proh hơmet kang ƀô̆, athei pơgơ̆r tơlĕch jang proh hơmet dôm kơchư̆k chĕp kơ̆l, vei lăng rim tơring, mă loi ‘noh jĭ proh hơmet kơchư̆k chĕp kơ̆l tơm dơnơm kơ rim tơring, anih jang jăl jang 2025-2030, 2026-2031. Tơdrong ‘nâu pơm lăp ‘meh vă ƀơ̆t măt đơ̆ng tơdrong proh hơmet tŏ sĕt bơngai jang hai, tơƀôh trĕng lăng gĭt kăl lơ̆m pơjing khŭl kang ƀô̆ gĭt kăl kơ Đảng hai.

Vă hơmet ăn bơngai jang ăn Hop akŏm 14 kơ Đảng, Anih tơm Chĭnh trĭ, Anih chĕp kơ̆l pơgơ̆r Trung ương jăl 13 hlôi pơgơ̆r set hơlen, yơ̆r ti, pơdrơ̆ng kiơ̆ roi tơƀôh bơngai jang đei pôk dơ̆ng păng vang jang ‘măng mă blŭng; roi tơbăt hơnăn athei pôk lơ̆m Khŭl chĕp kơ̆l pơgơ̆r Trung ương pơtruh ăn Hop akŏm XIV set hơlen pôk hơtŏk kiơ̆ tơdrong hơgăt.