Đăk Lăk dang ei đei pơhlom 42.000 ha sâu riêng, hăm hloh 26.000 ha oei đei plei, đei yua hloh 440.000 tâ̆n, mă lei teh pơtăm đei asong kơsô̆ pơkăp đei 7.400 ha. Lơ tơmam drăm yươ noh tam mă đei gơh tĕch ăn teh đak đe kiơ̆ pơkăp tơm, pơm tơjur kơjă tơmam drăm. Tang măt ăn minh hơnih jang mŭk drăm pơtăm păng răt sâu riêng tơ̆ tơring akhan, tơnap tap ưh hơdrô̆ đơ̆ng gah tơring răt tơmơ̆t mă oei ah trong pơm jang lơ̆m teh đak: “Tơ̆ Tây Nguyên, teh pơtăm hrou ou să mă ưh đei asong kơsô̆ pơkăp tơring pơtăm, ưh kơsĭ gah Trung Quốc ưh đei asong, mă kơlih kơdih po bơ̆n băt vao ưh kơ hloh, noh hăp jing tơhlăk. Oei tơchơ̆t  2481, 2480 chih hơdah kơyuơ gah kơdih bơ̆n pơm, kơdih bơ̆n tơroi păng Hơnih tơm jang Haih kuan pơkăp kiơ̆ bơ̆n tơroi vă pơtruh nơ̆r hăm kơpal. Thoi noh dang ei mưh nhen tơ̆ kơpal ưh kơ trŏ ƀlep noh Hơnih Choh jang xa păng Cham char athei hơmet mă trŏ ƀlep"   

Kơsô̆ pơkăp tơring pơtăm jĭ tơdrong pơkăp mă blŭng vă hơlen băt tơm a la chă, mă lei vă pơtrŏ hăm tơdrong tĕch ăn teh đak đe kơjăp sơđơ̆ng, tơdrong vei lăng athei đei pơm jang đơ̆ng choh pơtăm. Dôm teh đak răt tơmơ̆t dang ei ưh hơdrô̆ athei tơroi hơdah gah tơmam drăm truh đơ̆ng yơ, mă athei pơm hơdah gah trong pơm tơlĕch, tơmam choh pơtăm, iŏk yua, 'nŭng 'măn păng chơ pơdŭ. Hăm tơdrong pơkăp ou, Hơnih tơm Choh jang xa păng Cham char tŏk bŏk oei chih akŏm pơkăp hơlen băt tơm a la chă tơmam choh pơtăm drơ̆ng minh lơ̆m jơ̆p teh đak. Pơkăp ou asong chih akŏm tôm kơtơ̆ng ang đơ̆ng tơring pơtăm, tơdrong pơm tơlĕch, truh tơ̆ tĕch tơlĕch. Ah mă rim tơnô̆ tơmam drăm đei pơkăp hăm “hô sơ sô̆”, tơdrong hơlen băt păng pơkăp sơnong gô tenh kuăng, hơdah hloh pơtêng hăm trong jang vei lăng hơdrol ki.

Ƀok Lê Anh Trung, Kơdră Jơnŭm jang sâu riêng Đăk Lăk ăn tơbăt, tơdrong tơplih kiơ̆ hơlen băt hăm kơmăi điê̆n tưh gô tơgŭm hơlen tơnăp hloh gah trong pơm jang. Dang ei Jơnŭm jang tŏk bŏk oei jang hơdoi hăm dôm hơnih jang mŭk drăm vă pơm jang hơdrol, truh ou kơnh gô pơkăp drơ̆ng minh trong jang ou: “Nhôn hlôi rơih dôm hơnih jang mŭk drăm kơchăng vang jang pơlong năng. Mă blŭng, iŏk minh hơnih jang mŭk drăm pơm jang hơdrol hơnơ̆ng vă hơmet kơmăi kơmŏk kih thuơ̆t, đơ̆ng rŏng kơ noh pơtơm pơih să trong jang. Kơdih dôm hơnih jang mŭk drăm noh hơdrol ki đe sư hlôi pơgơ̆r jang tơroh tơring bơih, chŏng mă pơm jang noh ưh kơsĭ tơdrong tơnap tap dêh ôh. Mă lei tơdrong noh bơ̆n adoi hlôi hơmet, pơtrŏ hăm tơdrong jang sâu riêng. Hăp kăp gĭt đơ̆ng kih thuơ̆t pơm jang truh chă akŏm răt, truh pơm tơlĕch păng tĕch ăn teh đak đe”

Kiơ̆ kơ yă Đặng Thị Thủy, Phŏ Kơdră Hơnih Choh jang xa păng Cham char dêh char Đăk Lăk vă trong jang ou gơh đei jơnei kơjăp, tơnap tap tih hloh ưh kơsĭ ah kơmăi kơmŏk mă ah tơdrong tơplih trong juăt jang. Kon pơlei jang mir athei pơm juăt hăm tơdrong chih akŏm điê̆n tưh, pơm kiơ̆ pơkăp jang; hơnih jang mŭk drăm athei asong jang păng mă hơdah gah tơdrong chih răk; oei jơnŭm pơgơ̆r tơring noh athei pơtho, hơlen kơjăp. Mă lei, yă Thuỷ sơkơ̆t hơdah, tơring tŏk bŏk oei jang atŭm hăm dôm hơnih jang kơpal đei tơrĕk lơ̆m tơdrong chih akŏm yư lĭu răk lơ̆m kơmăi vă gơh iŏk yua nhen băl păng tôm tong: “Kơmăi ou athei mă trŏ hăm trong tơlĕch jang adoi nhen tơring pơtăm dang ei bơ̆n hơnơ̆ng pơngơ̆t, pơm jang păng đei tơdrong ưh kơ hơdah 'lơ̆ng pơrăm truh tơdrong pơm jang. Atŭm hăm noh kơmăi kơmŏk adoi tơgŭm hơtŏk tơdrong 'lơ̆ng păng đon lui hăm tơmam drăm, pơtrŏ hăm tơdrong kăl hơlen băt tơm a la chă đơ̆ng teh đak răt tơmơ̆t hrei ou, păng brư̆ brư̆ pơjing đei hơnăn sâu riêng Đăk Lăk pơma atŭm păng Việt Nam tŏk bŏk hơtŏk tơ-iung kơjăp sơđơ̆ng"

Ƀok Nguyễn Văn Long, Kơdră dơnơm kơ Hơnih jang Khua hŏk – Kŏng ngê̆, lơ̆m Hơnih tơm Choh pơtăm păng Cham char ăn tơbăt, kơmăi kơmŏk hơlen băt tơm a la chă teh đak tŏk bŏk đei iŏk jang pơlong năng hăm sâu riêng hơdrol kơ tơmơ̆t yua lang să đơ̆ng năr 1/7/2026. 'Nou đei lăng jĭ hơyak pơm jang tơplih đơ̆ng vei lăng pơm jang juăt jue jing trong vei lăng hăm yư lĭu răk, tơdrong kăp gĭt vă hơtŏk tơdrong tơgar jang kơ tơmam choh pơtăm Việt Nam: “Nhôn hơpơi 'meh kơmăi hơlen băt tơm a la chă ưh hơdrô̆ 'măn ăn tơdrong jang vei lăng mă tơpă jing tơmam drăm pơyua kăp gĭt ăn hơnih jang mŭk drăm păng kon pơlei, tơgop hơtŏk đon lui, hơnih dơ̆ng kơ sâu riêng Việt Nam lơ̆m apŭng plenh teh”.

Đơ̆ng dôm tơdrong tơhlăk tơhlĭn lơ̆m asong kơsô̆ pơkăp tơring pơtăm truh tơchơ̆t hơlen tơdrong 'lơ̆ng roi năr roi kơhret kơjăp, tơdrong jang sâu riêng Đăk Lăk tŏk bŏk oei tơplih tih tên. Ah mă kơmăi hơlen băt tơm a la chă đei iŏk yua, rim tơmam drăm gô đei  “tơm a” hơdah đơ̆ng dơnơm hloi. 'Nou jĭ trong vă sơkơ̆t hơdah tơdrong 'lơ̆ng, hơtŏk đon lui păng pơjing hơnăn sâu riêng Đăk Lăk pơma hơdrô̆ păng sâu riêng Việt Nam pơma atŭm lơ̆m apŭng plenh teh.