Hơiă kơ Hop akŏm Bơngai tang măt lơ̆m teh đak ‘măng mă XIV kơ Đảng, đơ̆ng hơtuch khei 12/2025, dêh char Khánh Hòa hlôi pơgơ̆r ming man, et hơtŏk 5 anih jang, tơdrong jang tih. Mŭk drăm tơpôl kơ dêh char hơnơ̆ng tŏk ‘lơ̆ng lơ̆m sơnăm 2025, pơm tơplih ‘lơ̆ng hơiă ăn tơdrong arih xa kơ kon pơlei đơ̆ng rŏng kơ ‘mi tih đak lơ̆p. Tơ̆ xăh Thuận Bắc, dêh char Khánh Hòa, lơ unh hnam hơnơ̆ng jang tŏk klăih đơ̆ng tơnuh hin kơjăp ‘lơ̆ng, hơđơ̆ng jơhngâm jang xa, pơjing tơdrong arih xa hiôk jơnap ƀiơ̆.

Yă Chamaléa Thị Điêm, bơngai Raglay, tơ̆ plei Đá Mài Dưới, xăh Thuận Bắc tơroi: “Hue lăng truh Hop akŏm mă XIV kơ Đảng, kon pơlei nhôn lui păng hơpơi ‘mĕh dôm bơngai tang măt hơnơ̆ng tơrek truh tơ̆ tơring kon kông; hơmet pơ ‘lơ̆ng Hla ar chinh trĭ mă lăp tơ̆ yăn  âu, tơmât jên jang trŏ tơdrong, trŏ bơngai. Kiơ̆ đơ̆ng noh, tơiung jơhngâm pran, đon adrin jang tŏk kơdih, pơvei kơjăp hăm băl, adrin jang tŏk đơ̆ng kon pơlei, vă kon pơlei kon kông ưh lăp klăih đơ̆ng tơnuh hin kơjăp ‘lơ̆ng đech mă oei tơgop ‘lơ̆ng ăn tơdrong jang tŏk atŭm kơ teh đak dơ̆ng”.

Truh hop akŏm Bơngai tang măt lơ̆m teh đak ‘măng mă XIV kơ Đảng, Đảng ƀô̆ dêh char Khánh Hòa đei 32 ‘nu bơngai tang măt. Đon jang tơnăp đơ̆ng dôm bơngai tang măt đei tơƀôh hơdăh kiơ̆ đơ̆ng hơmet ‘lơ̆ng rim tơdrong mưh năm hop akŏm. Dôm nơ̆r tơgop đơ̆ng kăn ƀô̆, đảng viên păng kon pơlei tơ̆ dêh char Khánh Hòa hăm dôm Hla ar chih kăl lơ̆m Hop akŏm đei chih akŏm, gơih ăn Trung ương đơ̆ng hrôih. Dôm bơngai tang măt ‘măn lơ jơnăr tơchĕng hơlen hla ar chih, vă vang pơma nuh gơ̆h đei yoa ‘lơ̆ng.

Phó Giáo sư, Tiến sĩ Phan Quốc Anh, thây pơtho tơ̆ Hnam Trưng Đại học Văn Lang, bơngai tang măt lơ̆m Khul Khánh Hòa vang truh Hop akŏm mă XIV ăn tơbăt: “Inh tôch lăp đon hăm hla ar Tơchơ̆t ‘măng mă âu mưh Đảng hơnơ̆ng tơƀôh hơdăh trong jang tưk tơiung jŏh ayŏ kơ dŏ xoang hơdai hăm jang tŏk mŭk drăm. Tơdrong tơchơ̆t chih hơdăh atŏk tơiung kơmăy kơmŏk pơyoa ăn joh ayŏ kơ dŏ xoang, pơjing kơjă kăp gĭt ăn teh đak, joh ayŏ kơ dŏ xoang kơ kon bơngai păng unh hnam; năng mŭk drăm jĭ tơmam joh ayŏ kăp gĭt pơyoa ăn tơdrong jang tŏk. Kiơ̆ đon jang tơnăp đơ̆ng bơngai tang măt, inh vă adrin vang tơgop nơ̆r lơ̆m dôm hla ar chih kăl, dôm tơdrong tơchơ̆t bơ̆ jang.”

Kiơ̆ ƀok Nghiêm Xuân Thành, Bí thư Đảng dêh char, Kơdră chĕp kơ̆l Khul tang măt ăn Đảng ƀô̆ dêh char Khánh Hòa, rim ‘nu bơngai tang măt lơ̆m khul vă hơtŏk đon tơnăp đơ̆ng kơdih, vang tơgop lơ nơ̆r tôch tơgăl ‘moi kiơ̆ tơdrong jang tŏk tơ̆ tơring păng teh đak. Mă loi, vă akŏm jơhngâm tơgop nơ̆r ăn dôm tơdrong mă dêh char chih iŏk đei mưh bơ̆ jang tơ̆ yăn âu  tơ̆ tơring:

“Hăm Khánh Hòa, dêh char hlôi păng tŏk bŏk tơchĕng hơlen, chih tơlĕch dôm trong jang, tơdrong tơgŭm, ưh lăp dơ̆ng ƀât iŏk yoa đĕch mă năm truh tơdrong vei lăng đak dơsĭ hai. Tơm hlŏh jĭ atŏk tơiung chă tơmang lăng, pơvih pơvăn, choh jang xa hăm kơmăy kơmŏk ‘nao, mă loi jĭ rong ka hơdang hăm kơmăy; atŏk tơdrong jang logistics păng jang kơmăy tơter đak dơsĭ. Atŭm hăm ‘nŏh, dêh char vă tơgop nơ̆r hơmet pơ ‘lơ̆ng trong pơgơ̆r, tơdrong tơgŭm tơ̆ teh đak vă tơiung jơhngâm pran ăn tơdrong jang tŏk mŭk drăm tơ̆ đak dơsĭ hăm dôm tơring đei lơ tơdrong ‘lơ̆ng, kiơ̆ đơ̆ng noh vang tơgop ‘lơ̆ng ăn tơdrong jang tŏk atŭm kơ teh đak.”

Đơ̆ng tơdrong jang tŏk tơ̆ yăn âu kơ tơring, mă loi dôm tơdrong jang đei mưh atŏk tơiung mŭk drăm, tơpôl, vei lăng tơdrong arih xa ăn kon pơlei păng trong vă jang tŏk pran kơjăp mŭk drăm đak dơsĭ, dôm bơngai tang măt Khánh Hòa hơmĕng vang tơgop ‘lơ̆ng ăn dôm tơdrong tơchơ̆t gĭt kăl lơ̆m Hop akŏm. Dôm nơ̆r tơgop tôch lăp, trŏ ƀlep ‘nŏh ưh lăp tơƀôh đon lui đơ̆ng kăn ƀô̆, đảng viên păng kon pơlei Khánh Hòa lơ̆m tơdrong jơnei đơ̆ng Hop akŏm mă XIV đĕch, mă oei tơƀôh đon pơhnŏng hơnơ̆ng yak hơdoi kŭm hăm teh đak bơ̆ jang đei đon hơpơi ‘mĕh jang tŏk hrĕnh, pran kơjăp, pơjing teh đak pơdrŏng hơnŭk hơnoa, hiôk chơt lơ̆m chăl ‘nao.