Hăm jơhngâm đon kŭp yom, kiơ̆ ƀai hơri “Hồn tử sĩ” tơƀôh jơhngâm đon ‘mêm bơnê păng ƀlŏk hơdơ̆r, hlŏh 30 ‘nu mon hŏk tro tơ̆ 7 xăh sơlam kơ dêh char Đắk Nông kŭp kơ̆l sŏh plang nhang, pơyơ̆r pơkao tơ̆ Rup man ƀlok hơdơ̆r kơ đe linh lôch tang teh đak tơ̆ Kơđông linh vei lăng ‘măng jang sơlam Bu Prăng (xăh Bu Prăng, apŭng Tuy Đức). ‘Nâu jĭ 1 păh lơ̆m "Jơ hŏk tơring sơlam" yoa Ƀô đô̆i vei lăng tơring sơlam Đắk Nông pơgơ̆r ăn đe mon hŏk tro. Tơ̆ âu, đe mon đei mơ̆ng nơ̆r tơroi găh tơdrong iung tơblăh, chu lôch hŭt hơkâu đơ̆ng chăl mĕ ƀă, yă ƀok adrol sơ̆, mă loi jĭ 16 ‘nu linh đơ̆ng Kơđônh vei lăng ‘măng jang sơlam Bu Prăng kơtang nuih mơng hlôi tơblăh truh lôch vă vei kơjăp tơring sơlam Bu Prăng. Dôm tơdrong gĭt kăl đơ̆ng chăl sơ̆ âu pơm ăn đe oh hŏk tro tôch hơiă, tơiung dơ̆ng jơhngâm đon ‘mêm kơ teh đak đơ̆ng đe mon.

Mon Y Dũng, hŏk tro lăm 7A5, Hnam trưng THCS Nguyễn Huệ, xăh Thuận An, apŭng Đắk Mil, kon rong Kơđông linh vei lăng tơring sơlam Thuận An tơroi: “Mưh vang truh hăm lăm hŏk kơtă tơ̆ yăn âu tơ̆ jrăng sơlam kon ƀôh tôch hưch hanh kơ teh đak ‘mêm kơ eng đơ̆ng bơ̆n. Kon ‘mĕh đei lơ jơ hŏk thoi âu dơ̆ng. Đơ̆ng rŏng âu mưh ‘lŏ kơnh, kon ‘mĕh jing ƀô đô̆i, vă vei lăng jrăng sơlam păng vei lăng teh đak bơ̆n.”        

Vang truh hăm "Jơ hŏk tơring sơlam", kŭm hăm sŏh plang nhang, pơyơ̆r pơkao tơ̆ Rup man đe linh lôch tang teh đak, đe mon hŏk tro oei đei thây hrŭk hơbăn ao linh chông ba năm năng, dăr joang tơ̆ trong sơlam, jrăng sơlam, anih vei lăng bơngai, gre mât lĕch tơ̆ tơring sơlam… vang mơ̆ng lơ tơdrong tơroi, dôm tơdrong tam mă đei lơ̆m hla ar hŏk tôch gĭt kăl hlôi tơiung đei jơhngâm đon ‘mêm kơ pơlei pơla, ‘mêm kơ teh đak păng hơnơ̆ng tưk tơiung jơhngâm adrin hŏk pơhrăm ăn đe mon.

‘Măng mă blŭng vang truh hăm "Jơ hŏk tơring sơlam" kơtă ƀât jrăng sơlam kơsô̆ 55, mon Triệu Thị Cẩm Nhung, hŏk tro lăm 9A, Hnam trưng jăl mônh păng jăl ƀar Bế Văn Đàn, xăh Thuận Hà, apŭng Đắk Song tôch hơiă găh dôm tơdrong hŏk đei tơ̆ yăn âu ‘nâu: “Kon ƀôh jơ hŏk tôch hơiă păng đei lơ ƀai roi tơƀôh tơ̆ yăn âu hơiă ƀiơ̆ kơ tơ̆ hnam trưng. Mưh đei truh hŏk pơhrăm tơ̆ yăn âu kon ƀôh jơhngâm đon ‘mêm kơ teh đak roi tŏk păng ƀôh kơdih kâu athei đei đon tơnăp ƀiơ̆ vă vei lăng ‘lơ̆ng tơring sơlam.”

Sơnăm ‘nâu jĭ sơnăm mă blŭng “Jơ hŏk tơring sơlam” đei Ƀô đô̆i vei lăng tơring sơlam dêh char Đắk Nông pơgơ̆r tơ̆ đĭ đăng kơđông linh lơ̆m 7 xăh sơlam, găh 4 apŭng Cư Jút, Đắk Mil, Đắk Song păng Tuy Đức. Adrol kơ ‘nŏh, đơ̆ng sơnăm 2018, Kơđông linh vei lăng tơring sơlam Tuy Đức (apŭng Tuy Đức) jĭ kơđông mă blŭng kơ dêh char pơgơ̆r jơ hŏk âu, hăm hơnăn krao blŭng a ‘nŏh Jơ hŏk tơ̆ tơring sơlam. Vă jê̆ 7 sơnăm âu ki, kơđông hơnơ̆ng vei lăng jơ hŏk pơhrăm tôch gĭt kăl âu.

Thiếu tá Nguyễn Văn Nga, Phŏ kơdră jang Chinh trĭ Kơđông linh vei lăng tơring sơlam Tuy Đức ăn tơbăt, kiơ̆ đơ̆ng tơdrong hŏk pơhrăm kơđông hơ pơi ‘mĕh vang tơgop tơgŭm ăn kon pơlei, hŏk tro tơ̆ tơring sơlam băt hơdăh, hlôh vao lơ hlŏh dơ̆ng dơ̆ng dôm tơdrong hơgăt mưh yak vih vât, mât lĕch tơ̆ tơring sơlam, băt hơdăh dơ̆ng tơdrong gơ̆h jang, hơnăp jang đơ̆ng đe Ƀô đô̆i vei lăng tơring sơlam. Atŭm hăm ‘nŏh, kiơ̆ đơ̆ng âu tơiung đei jơhngâm đon ‘mêm kơ teh đak ăn kon pơlei păng hŏk tro tơ̆ tơring sơlam.

Thiếu tá Nguyễn Văn Nga ăn tơbăt: “Kŭm hơpơi ‘mĕh tơiung đei jơhngâm đon ‘mêm kơ tơring sơlam, tơdrong pơm tơm kăp gĭt kơ teh đak hăm đe kon mon hŏk tro. Nhôn oei hơpơi ‘mĕh pơtho tơƀôh ăn ăn rim jơhnơr, đe kon mon hŏk tro păng kon pơlei, ưh lăp tơ̆ tơring sơlam đĕch mă tơ̆ dôm xăh lơ̆m dêh char vang vei lăng kơjăp ‘lơ̆ng trong sơlam, jrăng sơlam.”

Dôm jơ hŏk tơring sơlam tôch đei yoa păng gĭt kăl tŏk bŏk păr ang tơ̆ dôm tơring sơlam kơ dêh char Đắk Nông. Kiơ̆ dôm ƀai hŏk tơ̆ yăn âu hlôi tơgŭm ăn đe mon hŏk tro đei dơ̆ng đon hlôh vao, atŭm hăm ‘nŏh tưk tơiung jơhngâm đon ‘mêm kơ pơlei pơla, ‘mêm kơ teh đak, tơgŭm ăn đe mon adrin hŏk pơhrăm vă gơ̆h jing kon pơlei đei yoa ăn teh đak. Kŭm kiơ̆ đơ̆ng noh, vang tơgop ‘lơ̆ng, pơjing đei tơdrong jang đĭ đăng kon pơlei vang vei lăng kơjăp tơring sơlam kơ teh đak.