Pơm lêh iung jang đei pơgơ̆r lơ̆m jơ ‘năr Iung jang "500 măng năr atŏk kơtang iung jang năm tơchă, kôch akŏm păng hơlen băt hơnăn ƀô̆ đô̆i lôch dŏng teh đak", lăng truh tơbăt 80 sơnăm Năr Ƀô̆ đô̆i rơka-Lôch dŏng teh đak (27/7/2027). Iung pơma pơrô̆ jang tơ̆ pơm lêh, Kơ iĕng Thủ tướng Teh đak Phạm Thị Thanh Trà, Kơdră Hơnih Chĕp pơgơ̆r Teh đak găh tơchă, kôch akŏm păng hơlen băt hơdăh hơnăn ƀô̆ đô̆i lôch dŏng teh đak pơma hơdăh, tơdrong hơlen băt hơnăn ƀô̆ đô̆i lôch dŏng teh đak jĭ hơnăp jang gĭt kăl hloh hăm dôm bơngai plang ăn pham lĕch sĕch huŏng kơ yuơ pơm tơm kơdih, rơngei hiôk hian kơ Teh đak. Hrei ou lơ̆m teh đak oei pă hloh 175.000 ‘nu ƀô̆ đô̆i lôch dŏng teh đak tim mă tơchă ƀôh kơting, hloh 300.000 pơsat ƀô̆ đô̆i lôch dŏng teh đak oei tim mă băt hơnăn pơlei pơla. ‘Nou jĭ tơdrong pơngơ̆t tôch kơ dêh đơ̆ng khul jang chinh trĭ păng pơđĭ lơ̆m hơdrĕch hơdrung bơ̆n. Tơdrong jang gĭt kăl ou tŏk bok pơtrŭt kơtang lơm teh đak mĭnh păh jĭ hơnăp jang tơ̆ hơnăp chăl sơnăm, mĭnh păh jĭ tôch gĭt kăl pơjei hăm jơ ‘năr. Lăp đơ̆ng rŏng pơm lêh tơlĕch jang, rim bơngai tang măt hlôi ƀôh kang bang kơl tơdrong jang iŏk pham sŏk hơlen ADN hăm ŭnh hnam ƀô̆ đô̆i lôch dŏng teh đak oei lơ̆m pơlei tơm Hà Nội.