Tổng Bí thư ră hơdah: Kon pơlei jing dơnơm, jing tơm tơ-'ngla, jing tơdrong tơchơ̆t, jing jơhngơ̆m pran kơ hơtŏk tơ-iung. Rim jăl trong pơkăp jang athei tơrĕk truh tơdrong hơrih mŭk drăm păng đon bơnôh kơ Kon pơlei; vei sơđơ̆ng tơdrong pơm tơm kơđih kơ Kon pơlei; tơgĭt,t ơmơ̆ng păng gơnơm lơ̆m Kon pơlei.

Đảng athei tơguăt kơjăp hăm Kon pơlei, dăp đon dăp bơnôh pơm jang kơyuơ kon pơlei, chiu tơdrong hơlen đơ̆ng Kon pơlei, chiu pŭ sơnong jang hơnăp Kon pơlei gah rim tơdrong tơchơ̆t kơ po. Hla bar kăp gĭt đŏk tơbang ah Hop akŏm 'măng ou ră hơdah gah tơdrong tơlĕch pơm jang; athei hơtŏk tơdrong jang tơnăp kơ rim jăl jang, rim hơnih jang, rim kang ƀô̆; khŏm mă hơmet tơdrong "pơma lơ jang tŏ sĕt", "pơma 'lơ̆ng, jang tơjruh"; ưh đei chă hơlen lăng; tơlĕch tơchơ̆t kơjung mă lei pơm jang adar, ưh đei jơnei.

Vă pơjing đei tơdrong jang tơnăp, Tổng Bí thư pơgơ̆r, athei akŏm tơnăp lơ̆m 5 grŭp jang noh: Pơm jang hơdah kiơ̆ Hla bar kăp gĭt đŏk tơbang jing tơdrong jang tơpă, tơchơ̆t jang hơdah, athei pơkă khŏm mă đei, jơ năr păng asong tơdrong jang mă hơdah; rim tơdrong jang athei đei bơngai chiu pŭ sơnong truh tôch. Mă ƀar noh athei akŏm chă hơlen lăng, sơkơ̆t tơdrong jang ưh đei kiơ̆ pơkăp; khŏm mă sek tơlang tơdrong tơhlăk tơhlĭn, klenh kơ tơdrong jang. Mă 3 noh, hơvơn păng iŏk yua tơdrong kĕ đei tơnăp hloh; pơm jang mong ƀiơ̆ ưh đei pơhuach kư̆ kă; asong jang kiơ̆ tơm dơnơm. Mă 4, pơm jang athei mă tơpăt, gơh hơgei, khua hŏk; iŏk tơdrong lăp đon đơ̆ng kon pơlei păng hơnih jang mŭk drăm pơm tơdrong tơchơ̆t jang kăp gĭt; iŏk yư lĭu chih akŏm păng tơdrong jang đei vă pơm tơdrong tơchơ̆t jang đei. Mă 5, jang tơnăp tơdrong tơroi tơbăt vei sơđơ̆ng drơ̆ng lăp lơ̆m tơpôl. Tổng Bí thư sơkơ̆t hơdah: Ah mă drơ̆ng nơ̆r kơjung gah đon tơchĕng; kơjăp lơ̆m tơdrong jang; kơjăp lơ̆m kih luơ̆t; Kon pơlei tơpă jing hơnih dơnơm, noh tơpă Đảng bơ̆n gô pơjing tơdrong hơpơi 'meh jing tơdrong jang đei jơnei tơpă; hơ-'nhăk teh đak tŏk kơtang, kơjăp lơ̆m anglŏ sơnăm hơtŏk tơ-iung kơ teh đak.