Tổng Bí thư, Kơdră chĕp pơgơ̆r Teh đak Tô Lâm hôn bơnê kơtang rim grŭp jang tih kơ Thái Lan pơih să tơmơ̆t jên jang, mơdro sa tơ̆ Việt Nam păng kĕ pơjing đei tơdrong gĭt kăl ăn tơgoăt tơgoăl jang hơdoi dih băl. Tổng Bí thư, Kơdră chĕp pơgơ̆r Teh đak pơma hơdăh, Việt Nam lăng tơgoăt tơgoăl jang hơdoi gĭt kăl tôm tong hăm Thái Lan, lơm ou jang hơdoi mŭk drăm, mơdro sa, tơmơ̆t jên jang păng tơgoăt dih băl hơnih mơdro sa jĭ tơdrong git kăl hloh, tơgop pơm hơtŏk kơtang tŏk mŭk drăm kơjăp ‘lơ̆ng păng atŏk kơtang tơgoăt dih băl ƀar păh. Hôn bơnê tơdrong tơmơ̆t jên jang, mơdro sa đơ̆ng Grup jang TCC tơ̆ Việt Nam lơ̆m dôm sơnăm ou ki, Tổng Bí thư, Kơdră teh đak pơtrŭt Grup jang hơnơ̆ng tơmơ̆t jên jang, atok tơ iung bơ̆ jang mơdro sa tơ̆ Việt Nam kiơ̆ trong atŏk kơtang chĕp pơgơ̆r, pơtrŭt iŏk yoa khoa hŏk păng kmăi kmŏk, tơplih ‘nao tơchăr, vei lăng cham char păng tơgop kơtang ăn tơpôl kon pơlei tơring.

Jei lơm ‘măng năm tơmang Thái Lan, hơdrol kơ ‘noh, Tổng Bí thư, Kơdră chĕp pơgơ̆r Teh đak Tô Lâm hlôi năm truh soh hlôt nhang tơ̆ Hơnih gru gra gĭt kăl dăr sơnăm Kơdră chĕp pơgơ̆r teh đak Hồ Chí Minh păng tơƀơ̆p pơma dơnuh hăm bơngai Thái kơtŏng Việt tŏk bŏk hơrih sa tơ̆ Đông Bắc Thái Lan.