Pơgê ‘năr 22/9 kiơ̆ jơ tơ̆ tơring, Hop akŏm tih Ning mônh kơnh đei pơgơ̆r tih Anih jang kơ Liên hợp quốc tơ̆ New York, teh đak Mi hăm tơdrong vang akŏm đơ̆ng lơ Kơdră chĕp kơ̆l teh đak, dôm anih jang lơ̆m apŭng plenh teh păng tơ̆ tơring, kŭm hăm bơngai tang măt ăn dôm Khul grŭp tơpôl, khul jang khoa hŏk, jên hu păng anih tĕch mơdro. Tổng Bí thư, Kơdră teh đak Tô Lâm chĕp kơ̆l khul tang măt ăn teh đak bơ̆n vang truh hop akŏm.

Pơma tơ̆ hop akŏm, Tổng Bí thư, Kơdră teh đak bơ̆n, ƀok Tô Lâm ăn tơbăt; Việt Nam hôn bơnê dôm hla ar chih kăl đei drơ̆ng nơ̆r tơ̆ Hop akŏm păng hơmĕng dôm hla ar chih kăl âu đei tơlĕch jang pran ‘lơ̆ng păng đei yoa. Việt Nam hơpơi ‘mĕh Liên Hợp Quốc hăm hơnăp jang tơm, chĕp kơ̆l pơgơ̆r păng dôm anih jang lơ̆m apŭng plenh teh hơnơ̆ng đei tơdrong tơgop ‘lơ̆ng ƀiơ̆, đei yoa ƀiơ̆, roi pran ƀiơ̆ lơ̆m tơdrong tang găn dôm tơdrong răm găn trong jang tŏk hrĕnh, pran kơjăp kơ apŭng plenh teh iŏk đơ̆ng năr ‘nâu hloi. Việt Nam pơkăp vă tơgop ‘lơ̆ng, đei yoa ăn dôm tơdrong adrin atŭm vă pơjing apŭng plenh teh rơngei hiôk hian, jang tŏk hơtŏ băl yoa tơdrong arih xa phĭ tơtŏ dơnŏ ‘lơ̆ng, hiôk chơt kơ kon bơngai.