Pơgê 1/7, pơgơ̆r Hop akŏm lơ̆m teh đak hơlen năng trong jang Khul kơdră pơgơ̆r tơring 3 tăl, Tổng Bí thư, Kơdră teh đak Tô Lâm athei hơnơ̆ng hơmet pơ ‘lơ̆ng trong pơgơ̆r jang, jăh klăih song hơnăp jang hơdai hăm vei lăng kơjăp tơdrong chĕp kơ̆l pơgơ̆r, pơjing khul kăn ƀô̆ lăp hăm tơdrong ‘mĕh vă, pơm ‘lơ̆ng vă khul kơdră pơgơ̆r ‘nao gơ̆h bơ̆ jang đei yoa, pơvih roi ‘lơ̆ng ƀiơ̆ ăn kon pơlei păng anih tĕch mơdro. Tổng Bí thư, Kơdră teh đak pơma hơdăh, trong hơmet ming, kăt tơjur bơngai jang lơ̆m rim anih jang chinh trĭ ‘nŏh tôch trŏ, tôch gĭt kăl lăp hăm tơdrong vă jang tŏk đơ̆ng teh đak.

Tơ̆ hơnăp kơnh, athei hơlen năng, hơmet pơ ‘lơ̆ng rim khôi luơ̆t, pơm ‘lơ̆ng drơ̆ng 1 nơ̆r, rơđăh rơđong, hiôk hian ăn tơdrong bơ̆ jang tơ̆ 3 tăl khul kơdră pơgơ̆r. Anih chĕp kơ̆l đảng athei chĕp kơ̆l pơgơ̆r kiơ̆ trong jang đunh đai, gĭt kăl, hăm khul kăn ƀô̆ rơgei, hăm tơdrong dăr lăng kơjăp, hăm tơdrong jang đei jơnei 'lơ̆ng hơiă. Athei pơm 'lơ̆ng ăn tơdrong chĕp kơ̆l pơgơ̆r tôm tơdrong đơ̆ng Đảng, mă lei ưh đei pơm tơplih, ưh đei hơchăng pơhơi, ưh đei găn ga tơdrong jang vei lăng kiơ̆ hơnăp, tơdrong jang đơ̆ng dôm anih jang kơ teh đak, MTTQ păng dôm khul jang chinh trĭ, tơpôl.