Vang akŏm tơ̆ dôm anih pơih pơdăh đei Tổng Bí thư, Kơdră teh đak Tô Lâm, Thủ tướng Lê Minh Hưng, Kơdră Quốc hội Trần Thanh Mẫn, kŭm hăm lơ kơdră chĕp kơ̆l dang ei păng adrol sơ̆ kơ Đảng, Teh đak. ‘Măng pơih pơdăh đei pơgơ̆r tơ̆ 4 anih ‘nŏh: Hnam ƀlŏk hơdơ̆r kơ đe linh lôch tang ăn teh đak xăh Thanh Thủy (Tuyên Quang), Mul man Bắc Sơn (Hà Nội), Pơsat linh lôch tang ăn teh đak Trong 9 (Quảng Trị) păng Cham ngôi pơhiơ̆ Lê Thị Riêng (plt Hồ Chí Minh).

Tơdrong 'nâu vă tơƀôh hơdăh jơhngâm đon 'mêm bơnê kơ đe linh hlôi lôch tang ăn teh đak, atŭm hăm 'nŏh pôk pơ ư dôm khul jang oei hơnơ̆ng prăt măng, prăt năr năm sir chă, pôi akŏm păng chih hơdăh hơnăn kơting linh lôch tang ăn teh đak. Tơdrong pơih pơdăh "Sơnglŏng pơchrang tơƀôh trong" 'nŏh jĭ trong yak lơ̆m tơdrong jang "500 măng năr hơtŏk tơdrong sir chă, dônh akŏm păng chih hơdăh hơnăn đe linh lôch tang ăn teh đak".

Tơdrong ‘nâu đei pơgơ̆r nhen vă tơƀôh mĭnh jăl trong ƀĕnh tơdrong 'mêm băt, tơguăt chăl hơdrol sơ̆ hăm dang ei kiơ̆ đơ̆ng lơ ƀai nhak, tơmam so, mă loi jĭ dôm tơdrong tơroi đei tơpă, dôm 'măng "tơƀâp", "ngôi hơdai" đơ̆ng rŏng dôm jĭt sơnăm kơtă ƀât anih pơih pơdăh. "Dôm bơngai tam mă lai yơ lôch hiong", "Nơ̆r athei đơ̆ng plei nuih –Tơdrong jang 500 măng năr" păng "Chă dơ̆ng hơnăn ăn đe 'nhŏng" 'nŏh jĭ 3 chăl lơ̆m 'măng pơih pơdăh tivi "Sơnglŏng pơchrang tơƀôh trong".