Pơma pơgơ̆r tơ̆ Hop akŏm, Tổng Bí thư, Kơdră teh đak Tô Lâm pơma hơdăh, kang ƀô̆ Mặt trận athei đei đon nuih chĭnh trĭ, đei jơhngơ̆m đon ‘lơ̆ng hăm kon pơlei, đei bưng ai lơ̆m tơpôl, đei tơdrong băt krao hơvơn, pơma dơnuh, pơlung, pơma tơblang, hơmet pơ ‘lơ̆ng tơdrong; ưh kơ gơh hơtăih kon pơlei, ưh kơ gơh lăp bơ̆jang kiơ̆ roi tơbăt; athei năm truh hơnih, mơ̆ng truh tôch, pơma trŏ tơdrong tơpă, apĭnh trŏ hơnih, kiơ̆ truh tôch đei yua; vă Mặt trận jê̆ kon pơlei hloh, mơ̆ng kon pơlei să hloh, tơl tơroi hrĕnh hloh, dăr hơlen tơdrong hơmet pơ ‘lơ̆ng nơ̆r apĭnh đơ̆ng kon pơlei rơđăh hloh.

Tổng Bí thư, Kơdră teh đak Tô Lâm athei Mặt trận kăl kơ lăng tơchĕng hơlen lĭ luơ̆n, pơtôch yan âu găh tơgoăt pôm ƀơ̆r đon đĭ đăng hơdrĕch hơdrŭng, kon pơlei pơm tơm xã hội chủ nghĩa, tơdrong pơm tơm kơ Kon pơlei ‘noh jĭ hơnăp jang tôch kơ gĭt kăl; vang jang tơgŭm pơjing păng tơlĕch Tơdrong jang tơgoăt pôm ƀơ̆r đon đĭ đăng hơdrĕch hơdrŭng truh sơnăm 2035, trĕng lăng truh sơnăm 2045; pơm hơdăh hloh trong jang, tơdrong kăl hơtŏk jơhngơ̆m pran Kon pơlei, jơhngơ̆m pran joh ayŏ, jơhngơ̆m pran kon bơngai Việt Nam.