Jăl jang 2022-2026, rim kơdră Khŭl hlôi tŭn pran tơplih ‘nao tơdrong jang roi tơbăt, pơtho pơhrăm, kơchăng tơplih kơsô̆, hơtŏk tơiung dôm tơdrong pơtho pơhrăm lơ̆m hơnih mạng. Đĭ đăng Khŭl hơvơn hloh 6,5 triệu ‘nu đoàn viên păng vă jê̆ 49 triệu ‘nu hơdruh tơdăm vang jang dôm tơdrong jang tơgŭm.

Pôk pơ ư dôm jơnei iŏk đei, Tổng Bí thư, Kơdră teh đak drơ̆ng nơ̆r hăm trong jang, tơdrong hơgăt păng dôm hơnăp jang jăl jang ‘nao, hơdai hăm pơma hơdăh athei hơnơ̆ng pơm ‘lơ̆ng tơdrong jang pơtho pơhrăm đon tơchĕng kach mang, hơtŏk jơhngơ̆m ‘mêm kơ teh đak, đon nuih chĭnh trĭ, jơhngơ̆m đon, trong hơrih păng hơpơi ‘meh plang jơhngơ̆m ăn hơdruh tơdăm. Khŭl kăl kơ bơngơ̆t hloh truh tơdrong jang tơƀôh tơdrong jang, tơdrong hơrih sa joh ayŏ păng vei lăng hơdruh tơdăm tơ̆ rim tơring, grŭp bơngai oei lơ mơmat tat.