Năr 30/12, tơ̆ Hà Nội, Hŏk viê̆n Chinh trĭ kuôk ya Hồ Chí Minh pơgơ̆r Hop akŏm pơtôch tơdrong jang kơ sơnăm 2025 păng tơlĕch tơdrong jang ăn sơnăm 2026. Tổng Bí thư Tô Lâm năm akŏm păng pơma pơgơ̆r. Tơbăt nơ̆r tơtă đơ̆ng Ƀok Kơdră Hồ Chí Minh: “Pơhrăm đe kan ƀô̆ jĭ tơdrong jang dơnơm kơ Đảng”, Tổng Bí thư ră hơdah, Hŏk viê̆n jĭ hơnih akŏm tơdrong rơgei, trong jang chinh trĭ păng tơdrong hlôh vao kơ Đảng bơ̆n; hơnih chih hơlen nơ̆r pơma chinh trĭ kăp gĭt kơ teh đak; jĭ hơnih kăp gĭt lui ngeh lơ̆m tơdrong pơtho pơhrăm đe kan ƀô̆, mă kăl noh đe kan ƀô̆ kơpal hloh.

Lơ̆m khei năr tôm hơnih jang Đảng, tôm kon pơlei, tôm khul linh tŏk bŏk oei năng truh tơdrong Hop akŏm mă 14 hăm tơdrong hơpơi pơih đei minh jăl jang hơtŏk tơ-iung 'nao, Tổng Bí thư akhan, khei năr truh Hŏk viê̆n Chinh trĭ kuôk ya Hồ Chí Minh akŏm pơm jang 6 tơdrong jang tơm, pơtoi tơplih 'nao trong pơtho pơhrăm kan ƀô̆ kiơ̆ trong jang đei jơnei tơnăp, gơh hơgei,  tơguăt kơjăp hăm tơdrong kăl pơm jang kiơ̆ dôm tơdrong tơchơ̆t kăp gĭt kơ Đảng.