Lơ̆m noh, Chih tơbang kăp gĭt gah chinh trĭ akŏm đei 3 Tơdrong chih (Tơbang chinh trĭ, Tơbang gah mŭk drăm – tơpôl păng Tơbang pơtôch tơdrong jang pơ-'lơ̆ng Đảng) pơjing đei minh tơdrong drơ̆ng nơ̆r, tôm tong, kăp gĭt, kơđeh, ƀônh hlôh vao, ƀônh ƀlŏk băt, ƀônh pơm jang. Tơdrong tơlĕch pơm kiơ̆ Tơchơ̆t Hop akŏm mă 14 ră hơdah "tơm dơnơm, trong jang, bơngai jang, pơkăp truh" vă tơlĕch pơm kiơ̆.

Tổng Bí thư Tô Lâm ră hơdah: Mŭk drăm, hơnih dơ̆ng, đon lui lơ̆m apŭng plenh teh kơ teh đak bơ̆n kĕ đei nhen hrei ou jing tơdrong akŏm đei đơ̆ng joh ayŏ juăt jue kơ rơbou sơnăm tơ-iung pơjing păng vei lăng teh đak; jĭ tơdrong đei jơnei kơ 96 sơnăm tơ-iung pơjing păng hơtŏk teh đak hăm tơdrong pơgơ̆r đơ̆ng Đảng; jĭ tơdrong đei jơnei kơ 40 sơnăm tơplih 'nao; jĭ tơdrong plang, hiơt dơh po đơ̆ng lơ khul linh kăch mang, đe đảng viên cộng sản, đơ̆ng kon pơlei hlôi hăt hot pơm jang, nuih mơng plang dơh hơkou po. Gah tơchơ̆t hơtŏk tơ-iung teh đak jăl sơnăm 2026 - 2030 păng sơkơ̆t truh sơnăm 2045, Tổng Bí thư ăn tơbăt, vei sơđơ̆ng tơdrong rơngei hiôk hian; hơtŏk tơ-iung tenh, kơjăp ăn teh đak; hơtŏk tôm tong ăn tơdrong hơrih kon pơlei; kơdih tơlĕch trong pơm jang, lui ngeh yak jang kiơ̆ anglŏ sơnăm 'nao kơ kon pơlei. Hơdrin đei jơnei tơdrong hơtŏk GDP đơ̆ng 10%/sơnăm tŏk tơ̆ kơpal; đei yua hăm rim 'nu bơngai jang truh sơnăm 2030 đei pơhlom 8.500 USD. Vă pơm kiơ̆ dôm tơchơ̆t tơlĕch, Hla bar tơbang chinh trĭ sơkơ̆t hơdah 12 tơdrong jang tih; 6 sơnong jang dơnơm păng 3 tơđrong jang kăl hloh.

Tổng Bí thư akhan, yak ah jăl jang kơ 'măng Hop akŏm mă 14, athei tơlĕch jang mă kơtang, jang mă tenh, jang truh trơ̆p truh tôch. Hơla hla kơ nuih mơng kơ Đảng, tôm Đảng, tôm kon pơlei păng khul linh dah atŭm jơhngơ̆m minh đon minh bơnôh vei sơđơ̆ng đon lui, tơnăp hăm sơnong jang, iŏk yua kơ̆l 'ngok hơgei, tơ-iung tơdrong hơpơi 'meh; pơm ăn rim sơnăm, rim khei, rim năr đơ̆ng kơ Hop akŏm adoi gơh đei jơnei hơdah, đei tơdrong tơplih kăp gĭt; vă Kon pơlei ƀôh, Kon pơlei lui, Kon pơlei tơgŭm, Kon pơlei yak hơdoi păng Kon pơlei xa yua.