Kơsơ̆ năr 15/12, tơ̆ Hưng Yên, Tổng Bí thư Tô Lâm atŭm hăm rim bơngai jang tang măt ăn Kuô̆k hô̆i dêh char hlôi akŏm pơma dơnuh hăm kon pơlei tah hla dôm xah Kiến Xương, Lê Lợi păng Quang Lịch, tơroi gah tơdrong jơnei kơ 'Măng hop akŏm mă 10, Kuô̆k hô̆i jăl 15 păng tơmơ̆ng, tơl nơ̆r pơtruh đơ̆ng kon pơlei tah hla.

Tổng Bí thư ăn tơbăt tơdrong jang mŭk drăm – tơpôl lơ̆m teh đak pơtoi sơđơ̆ng, hơtŏk kăp gĭt lơ̆m khei năr apŭng plenh teh oei lơ tơsŭl tơsăl; tơdrong jang hơmet ăn Hop akŏm bơngai jang tang măt jơ̆p teh đak mă 14 kơ Đảng tŏk bŏk đei pơm jang tơnăp, kơchĕng gô vă pơgơ̆r ah khei 1 ou kơnh. Gah jơnŭm pơgơ̆r tơring 2 tăl, Tổng Bí thư athei hơtŏk tenh pơkăp hơnih jang, mŭk drăm atŭm, hơtŏk rơgei hăm khul kan ƀô̆ jang tơ̆ tơring, hơtŏk klah asong tơdrong pơgơ̆r jang.  Ƀơ̆t 'măng ou, Tổng Bí thư asong 30 tŏ kơmăi vi tĭnh ăn 3 xah tơ̆ Hưng Yên; năm hơpong ngôi, asong tơmam ăn unh hnam linh jĭ rơka Nguyễn Trọng Hiếu, bơngai tơgŭm jang dăp đon dăp bơnôh ăn tơring.