Tang măt đe kơdră chĕp kơ̆l, Đảng, Teh đak, gơih nơ̆r apĭnh jet gia tơpăt, tơdrong ƀlŏk hơdơ̆r gĭt kăl păng dôm tơdrong ‘mêm tơpă hloh truh đĭ đăng lĭnh so, hơdruh tơdăm xŭng phŏng sơ̆, lĭnh kon pơlei vei lăng kơdih, đe Mĕ Việt Nam nuih mơng, dôm ŭnh hnam đei kŏng hăm teh đak, đe lĭnh jĭ rơka, lĭnh jĭ jăn, ŭnh hnam lĭnh lôch tang ăn teh đak lơ̆m teh đak; Tổng Bí thư pơma hơdăh, Tơblăh jơnei Pơyan puih mak sơnăm 1975 ưh khan lăp đei tơdrong ‘lơ̆ng jơhnơr hơrih hăm hơdrĕch hơdrŭng Việt Nam, mă oei đei tơdrong hơiă chăl hle; tơgŭm pran kơtang tơdrong jang iung tơblăh pơm rơngei hơdrĕch hơdrŭng lơ̆m jơ̆p apŭng plĕnh teh. ‘Noh jĭ jơnei đơ̆ng jơhngơ̆m đon ‘mêm kơ teh đak tôch kơ dêh, đơ̆ng grŭp tơgoăt pôm nơ̆r ƀơ̆r đon đĭ đăng hơdrĕch hơdrŭng.

‘Noh jĭ jơnei đơ̆ng kơ triê̆u kon bơngai hmă mă lei tôch kơ tang, chu plang sơnăm mơlôh, ƀơ̆t lăp pơđĭ hloi hơkâu jăn kơdih ăn teh đak đei rơngei păng jơnei, ăn hơdrĕch hơdrŭng đei hiôk hian. Tổng Bí thư pơma hơdăh: Đảng, teh đak ling lang lăng kăl tơdrong jang “ƀlŏk băt bơnê”, tơdrong jang tơgŭm khôi luơ̆t tơgŭm hơdrol ăn bơngai đei kŏng ưh kơ đei pơdơh jang ‘lơ̆ng, roi ‘năr roi dang ăi, ‘mêm mơnat păng lăp hăm yan âu.