Tơ̆ jơ bơ̆jang dôm bơngai tang măt hlôi akŏm pơma dơnuh dôm trong jang pơjing 2 Tơdrong tơchơ̆t gĭt kăl kơ Trung ương ‘noh jĭ Tơdrong tơchơ̆t găh tơplih ‘nao tơdrong jang hơtŏk tơiung Teh đak kiơ̆ lơ̆m khoa hŏk kơmăy kơmŏk, tơplih ‘nao pơcheh hơgei, tơplih kơsô̆ păng tơdrong tơchơ̆t găh dôm trong jang gĭt kăl vă pơtrŭt jang tŏk 2 kơsô̆ tơklep hăm pơjing tơdrong jang tŏk ‘nao. ‘Nâu tă kơ jing dôm tơdrong gĭt kăl ngăl, kăl kơ hơmet ăn hrôih vă tơlĕch jang hloi tơdrong tơchơ̆t Hop akŏm Đảng lơ̆m teh đak ‘măng mă 14 vă jê̆ truh.

Tổng Bí thư Tô Lâm lăng ‘lơ̆ng dôm jơnei tơchĕng hơlen blŭng a kơ Anih vei lăng tơdrong jang tơgŭm păng tơdrong jang gĭt kăl Trung ương ‘noh kŭm đei tôm, hơdai hăm tơƀôh ăn trong jang găh 1,2 ‘meh vă păng hơnăp jang tơ̆ hơnăp kơnh lơ̆m tơdrong pơjing 2 tơdrong tơchơ̆t âu. Tổng Bí thư akhan, ‘nâu jĭ jăl trong khŏm athei jang kiơ̆ vă jang ‘lơ̆ng 2 tơdrong hơgăt 100 sơnăm kơ Teh đak, pơjing 1 teh đak Việt Nam rơngei, hiôk hian, kon pơlei pơm tơm, pơdrŏng pran, hơnŭk hơnoa, hơgei, hiôk chơt; rim tơdrong jang tơgŭm găh hơtŏk tơiung tă kơ athei tơlĕch lơ̆m trong jang akŏm âu.