Pơma pơtôch jơ bơ̆ jang, Tổng Bí thư athei Đang ủy Khul kơdră chĕp pơgơ̆r Teh đak iung jang hơdoi hăm rim hơnih bơ̆ jang tĕnh koăng lăng hơlen pơtôch jang kiơ̆ Tơdrong tơchơ̆t kơsô̆ 19 găh choh jang sa, kon pơlei choh jang sa păng Tơdrong tơchơ̆t kơsô̆ 06 găh pơprŏ ăn, tơ iung pơjing, vei lăng tơring kơdrơ̆m. Tổng Bí thư athei, hơlen kăl mă trŏ ƀlep, tôm tong, tơƀôh hơdăh dôm tơdrong kăl hơmet ming; adoi tơchĕng hơlen mă brĕ dôm tơdrong long ‘nao đơ̆ng rŏng proh hơmet tơring, hơnih jang, trong bơ̆ jang khul kơdră tơring ƀar kâp. ‘Ngoăih kơ ‘noh, kăl hơlen lăng trong atŏk tơ iung tơring kơdrơ̆m, tơring choh jang sa lơ̆m apŭng plĕnh teh vă tơmơ̆t dơ̆ng, hơmet ming, sơđơ̆ng rim tơdrong tơchơ̆t trŏ lăp yan ou, sơđơ̆ng ăn tơdrong ‘meh vă atŏk tơ iung teh đak lơ̆m chăl ‘nao.