Pơma dơnuh hăm lơ bơngai jang gah ngar, Tổng Bí thư Tô Lâm sơkơ̆t hơdah, ưh hơdrô̆ lơ̆m tơdrong tơjră iŏk rơngei ăn teh đak mă lơ̆m tơdrong vei lăng păng tơ-iung chăl xah hô̆i chu nghia, rim bơngai jang Việt Nam, lơ̆m noh đei bơngai jang gah ngar, hơnơ̆ng jing khul jang dơnơm, yuk hơlou lơ̆m tơdrong jang păng hơtŏk mŭk drăm, lơ̆m pơm jang dôm sơnong dơnơm kơ teh đak. Tổng Bí thư Tô Lâm pơtruh nơ̆r hơpơi 'meh bơngai jang păng hơnih jang ngăr – tơmo kăp gĭt kăl đei pơm hơdah lơ̆m dôm tơdrong dơnơm noh: hơtŏk tơdrong pơm jang 'lơ̆ng.

Tôm hơnih jang pơtoi tơplih 'nao trong pơm jang, hơtŏk jang hăm kơmăi kơmŏk, iŏk yua khua hŏk – kơmăi kơmŏk 'nao păng tơplih kơmăi kơsô̆ lơ̆m pơgơ̆r jang, vei lăng tơmo gĭt. Tổng Bí thư pơgơ̆r hăm Hơnih jang Kŏng ngĭp Ngar păng Tơmo kăp gĭt Việt Nam pơtoi tơgŭm hnam oei, tơdrong pơyua păng dôm tơdrong kăl lơ̆m hơrih jang xa kơ bơngai jang. Mă kăl noh pơjing tơdrong hơrih sơđơ̆ng, gơh hơgei, tơguăt kơjăp gô tơgŭm bơngai jang sơđơ̆ng jơhngơ̆m pơm jang, tơguăt kơjăp hăm hơnih jang ngar.