Jơ bơ̆jang vă vei kơjăp gĭt kăl jơhngơ̆m đon Hop akŏm XIV đơ̆ng Đảng, pơm rơđăh trong vă jang hơtŏk tơiung trŏ lăp hăm dêh char, tơring tơrang, tơring sơlam đei tơdrong joăt joe kach mang păng jang hơdai ‘lơ̆ng rim tơdrong jang đơ̆ng Trung ương jing hơnăp jang, trong jang ‘lơ̆ng. Pơtôch jơ bơ̆jang, Tổng Bí thư lăng ‘lơ̆ng jơhngơ̆m đon tơpăt, ‘meh vă hŏk pơhrăm đơ̆ng dêh char Cao Bằng ƀơ̆t lăng ƀôh rơđăh dôm tơdrong tam mă ‘lơ̆ng nhen hơnih tĕch mơdro oei mơmat tat, GRDP jô̆ păh lăp kơ̆l bơngai tŏ sĕt.

Tổng Bí thư pơma hơdăh tơdrong pơ̆n lăng tơpăt tơdrong tơpă, ưh kơ veh ver tơdrong tơhlăk ‘noh jĭ tơdrong ‘lơ̆ng gĭt kăl vă rơih iŏk ƀlep trong năm, pơm tơdrong ‘lơ̆ng tơ̆ hơnăp kơnh; hơdai hăm athei hơtŏk ‘lơ̆ng pơgơ̆r bơ̆jang kiơ̆, ki luơ̆t, hơtŏk tơiung dôm anih jang mŭk drăm tưk tơiung nhen mŭk drăm tĕch mơdro tơring sơlam, logistics, tơmang lăng păng choh jang sa gĭt kăl tơklep hăm pơvih pơvăn.