Tơbăt 96 sơnăm năr tơ-iung pơjing Đảng Cộng sản Việt Nam, hmach sô̆ kơ tơdrong đei jơnei Hop akŏm 'măng mă 14 kơ Đảng păng hơmet sơng sô̆ Têt Nguyên Đán Bính Ngọ 2026, pơgê năr (10/02) Tổng Bí thư Tô Lâm hlôi truh plang hlôt nhang, plang pơkao ƀlŏk tơbăt kơ dôm Ƀok Kơdră kơpal so yuk trong hơlou kơ Đảng păng đe linh lôch tang tơ̆ Hưng Yên păng Bắc Ninh. Lơ̆m tơdrong kŭp jom, ƀrơ̆k kơ jơhngơ̆m, tơ̆ Hơnih ƀlŏk tơbăt kơ Tổng Bí thư Nguyễn Văn Cừ (phương Phù Khê, dêh char Bắc Ninh), Tổng Bí thư Tô Lâm atŭm hăm Khul kơpal kŭp yom plang pơkao, hlôt nhang ƀlŏk tơbăt păng pôk bơnê kơ tơdrong tơgop tih tên đơ̆ng Ƀok Tổng Bí thư Nguyễn Văn Cừ, bơngai cộng sản đim 'lơ̆ng, bơngai kon gơh hơgei kơ kon pơlei Việt Nam păng pơlei pơla Bắc Ninh. 

Tơ̆ Hnam ƀlŏk tơbăt kơ Tổng Bí thư Nguyễn Văn Linh (xah Nguyễn Văn Linh, dêh char Hưng Yên), Tổng Bí thư Tô Lâm păng Khul kơpal kŭp yom plang pơkao, hlôt nhang ƀlŏk tơbăt kơ Tổng Bí thư Nguyễn Văn Linh, bơngai đảng viên dơnưp 'lơ̆ng, đĭ jơhnơr hơrih pơm jang ăn tơdrong rơngei hiôk hian păng chủ nghĩa xã hội, bơngai kơdră gơh hơgei tơnăp  “Pơma păng Jang hloi”, bơngai hŏk tro gơh hơgei hloh kơ Ƀok Kơdră Hồ Chí Minh, bơngai kon rơgei hloh kơ pơlei pơla Hưng Yên.