Kơsơ̆ 27/1, Tổng Bí thư Tô Lâm pơgơ̆r jơ bơ̆ jang hăm Khul kơdră chĕp kơ̆l Đảng ƀô̆ dêh char Quảng Ninh găh dôm trong jang atŏk tơiung mŭk drăm, tơpôl, vei sơđơ̆ng teh đak. Hla ar tơroi tơ̆ jơ bơ̆ jang ăn ƀôh, sơnăm 2025, GRDP (Akŏm đĭ đăng tơmam jang đei tơ̆ dêh char) kơ Quảng Ninh tŏk vă jê̆ 12%, lơ hlŏh lơ̆m teh đak; tơdrong jang mŭk drăm đei pơih xă, jơhngâm jang tŏk hlŏh 13%, thu mong jên ăn teh đak hlŏh 85 rơbâu ti, jên tơmât jang hơnơ̆ng tŏk ‘lơ̆ng.

Pơma tơ̆ jơ bơ̆ jang, Tổng Bí thư athei Quảng Ninh hlôh vao kơjăp jơhngâm đon đơ̆ng Hop akŏm mă XIV kơ Đảng, tơlĕch jang hrơ̆ch ‘lơ̆ng dôm trong jang tơm, gĭt kăl, pơjing tơdrong jang mă hơdăh, đei yoa, chih hơdăh tơ ‘ngla jang, trong bơ̆ jang, jên tơmam vă jang păng đon pơhnŏng. Atŭm hăm ‘nŏh, tơring athei hơmet ming trong jang tŏk, tơmât hơdai rim achon kông, tơring sơlam, tơmam kăp gĭt păng tơring kơdrâm jing 1 trong jang kơjăp ‘lơ̆ng vă pơjing jơhngâm pran ăn tơdrong jang tŏk đunh đai.