Pơma pơtôch ‘măng hop akŏm, Tổng Bí thư Tô Lâm pơma hơdăh iŏk yua bơ̆ jang kiơ̆ tơdrong Tơchơ̆t 66 khei ‘năr âu ki hlôi pơm đei tơplih rơđăh hăm lơ tơdrong ‘lơ̆ng lơ̆m tơdrong jang pơjing, jang đang tơdrong hơgăt, khôi luơ̆t, pơm lăp hăm ‘meh vă hơtŏk tơiung teh đak. Tổng Bí thư athei, Đảng ủy Quốc hội, Đảng ủy khŭl kơdră teh đak, dôm anih tơm, anih jang tơ̆ Trung ương păng tơring hơnơ̆ng vei kơjăp, jang kiơ̆ tôm tơdrong hơgăt, athei, hơnăp jang hlôi tơlĕch ăn lơ̆m tơdrong tơchơ̆t.

Tơroi rơđăh, sơnăm 2026 jĭ sơnăm tôch kơ gĭt kăl - sơnăm mă blŭng tơlĕch jang Tơdrong tơchơ̆t Hop akŏm Đảng ‘măng mă XIV hăm jơhngơ̆m đon hơnhăk tơdrong tơchơ̆t yak mơ̆t lơ̆m tơdrong hơrih sa, ưh kơ gơh hiơ̆ hyĭn, Tổng Bí thư athei, akŏm 3 tơdrong, ‘noh jĭ dăr hơlen tơdrong hơgăt ‘lơ̆ng dôm trong jang tih lơ̆m hla ar kăl Hop akŏm XIV; tơtĕnh jang dôm hla ar vă tơlĕch ăn 51 luơ̆t păng 8 tơdrong tơchơ̆t ‘nao đei ‘Măng hop akŏm mă 10, Quốc hội jăl XV pơdrơ̆ng kiơ̆, ưh kơ lê̆ hiơ̆ dôm hla ar pơtho păng dôm tơdrong hiôk vă jang kiơ̆ păng akŏm hơmet pơ ‘lơ̆ng hrĕnh hloh dôm tơdrong pơmat tat, tơhlăk tơhlĭn găh khôi luơ̆t, ưh kơ lê̆ pơgăn tơdrong hơtŏk tơiung; hơmet ‘lơ̆ng 317 nơ̆r roi tơbăt, apĭnh đei mơmat tat, tơhlăk tơhlĭn lơ̆m sơnăm 2026 kiơ̆ trong jang hlôi đei băt hơdăh; kơchăng hơmet pơ ‘lơ̆ng dôm nơ̆r apĭnh, roi tơbăt ‘nao đei ƀôh đơ̆ng yan âu.