Kiơ̆ kơ Tổng Bí thư, yak mơ̆t chăl tơplih ‘nao, mă loi ‘noh jĭ dôm sơnăm tơ jê̆ âu, Anih pơvih pơvăn ăn khŭl lĭnh - Ki thuơ̆t kŭm hlôi jang đang tôch kơ hơgei hơnăp jang tơgŭm gĭt kăl hăm Quân ủy Trung ương, Anih tơm vei lăng khŭl lĭnh dôm trong jang chĕp kơ̆l, pơgơ̆r hơmet tôm bơngai jang, tơmơ̆t hơdai, pơgơ̆r dơ̆ng anih jang, anih pơvih pơvăn - ki thuơ̆t tŏ sĕt bơngai jang, hrơ̆ch, drơ̆ng 1 nơ̆r đơ̆ng tơring truh đĭ đăng lơ̆m khŭl lĭnh pơjing păng tơlĕch jang đei yua lơ tơdrong jang, trong tơlĕch jang đei ‘lơ̆ng gĭt kăl hơmet ming, hơtŏk ‘lơ̆ng tơdrong bơ̆jang, tơgŭm, pơvih pơvăn - ki thuơ̆t khŭl lĭnh, hơtŏk ‘lơ̆ng jơhngơ̆m pran iung jang, tơgop pơjing khŭl lĭnh hơgei pran, chính quy, ‘nao.

Tơ̆ hơnăp kơnh, tơroi rơđăh ‘meh vă, hơnơ̆ng pơjing khŭl lĭnh păng anih pơvih pơvăn ăn khŭl lĭnh - ki thuơ̆t kach mang chính quy, hơgei, ‘nao, pơm lăp hăm hơnăp jang pơjing păng vei lăng kơjăp teh đak lơ̆m tơdrong ‘nao, Tổng Bí thư athei Anih pơvih pơvăn ăn khŭl lĭnh - Ki thuơ̆t akŏm bơ̆jang kiơ̆ ‘lơ̆ng 5 hơnăp jang tơm ‘noh jĭ akŏm jang kiơ̆, hŏk pơhrăm, tơlĕch jang kiơ̆ dôm tơdrong Tơchơ̆t, athei, pơtôch, hơgăt đơ̆ng Trung ương, Quân ủy Trung ương, Anih tơm vei lăng Khŭl lĭnh, tơm ‘noh jĭ Tơdrong tơchơ̆t Hop akŏm XIV kơ Đảng, Tơdrong tơchơ̆t Hop akŏm Đảng bộ Khŭl lĭnh ‘măng mă XII, dôm tơdrong Tơchơ̆t gĭt kăl đơ̆ng Anih tơm Chĭnh trĭ ‘nao tơlĕch ăn.