Tang măt ăn rim Kơdră chĕp pơgơ̆r Đảng, Teh đak pôk ăn Mê đai Hồ Chí Minh ‘măng mă 2 ăn Ban Nội chính Trung ương, Tổng Bí thư Tô Lâm sơkơ̆t hơdăh, bơ̆ jang nội chính ling lang đei Đảng păng Kơdră chĕp pơgơ̆r teh đak Hồ Chí Minh lăng kơjăp, xơkơ̆t hơdăh jĭ tơdrong jang kăl hloh vă vei lăng năng tông Đảng, vei lăng năng tông chăl chĕp pơgơ̆r, vei lăng năng tông pơm tơm păng đei iŏk yoa sa hơpăh trŏ lăp kơ Kon pơlei. Adoi sơkơ̆t hơdăh, lơ̆m rim chăl sơnăm, mă đơ̆ng lơ̆m khei ‘năr mơmat tat, tơnap tap, rim jơhnơr kang ƀô̆ hơnih jang Nội chính Đảng ling lang mĭnh nơ̆r ƀơ̆r đon hăm Đảng, teh đak păng Kon pơlei; bơ̆ jang ‘lơ̆ng, đei jơhngơ̆m đon tơpăt, tơnăp, nuih mơng iung tơjră vei lăng tơdrong trŏ tơdrong ƀlep, kơrŭn đĭ ai iung tơjră phă pơrăm dôm tơdrong glăi. Pơma hơdăh, lơ̆m chăl atŏk tơ iung ‘nao, hơnih jang Nội chính Đảng kăl hơnơ̆ng kiơ̆ yok rok jơ̆ng tơdrong jang pran kơtang gơ̆h hơgei lơ̆m prăt 60 sơnăm ou ki; hơnơ̆ng tơplih ‘nao trong tơchăr, trong jang păng bơ̆ jang; hơtŏ hăm pơchoh trong jang kăl; pran kơjăp iăp kơtang jang ‘lơ̆ng hơnăp jang “vei lăng ‘măng jang” ăn kơ Đảng lơ̆m tơdrong Nội chính, tang găn hơlou, iung tơjră phă pơrăm sa pơgơ̆m pơjĭp, pơhoach brăh brư, pơm tơdrong kơnê̆ păng hơmet pơ ‘lơ̆ng khôi luơ̆t tơm.