Kơsơ̆ 'năr brei (29/12) tơ̆ Hà Nội, Tổng Bí thư Tô Lâm truh hơpong ngôi păng pơgơ̆r jơ pơm jang hăm Hơnih chih akŏm yư kĭu kuôk ya kơsô̆ 1. Đei tơ-iung pơjing đơ̆ng blŭng sơnăm ou, dang ei Hơnih chih akŏm yư kĭu kuôk ya kơsô̆ 1 hlôi keh đang lơ tơdrong chih akŏm tơdrong kăl 'măn ăn tơdrong jang vei lăng đơ̆ng teh đak păng hơtŏk mŭk drăm – tơpôl. Kŏng thŏng tin kuôk ya tŏk bŏk oei đei pơm jang akŏm kiơ̆ trong jing “hơnih jang minh kơnao kơsô̆ akŏm hơdrô̆”, tơgŭm hiôk hloh ăn tơdrong pơm hla bar kăl hlôi đei chih akŏm hơdrol... Lơ̆m jơ pơm jang, Tổng Bí thư Tô Lâm bơnê kơ dôm tơdrong jang đei jơnei mă Hơnih tơm Kŏng an, rim Hơnih jang đei tơrĕk păng tôm kan ƀô̆ linh tơ̆ Hơnih chih akŏm yư kĭu kuôk ya hlôi jang đei jơnei lơ̆m khei năr ou ki.

Tổng Bí thư adoi tơƀôh hơdah, 3 tơdrong tơnap tap tih hloh adoi jĭ 3 “hơnih tơhlăk” kăl kơ găn hloh: noh jing dôm tơdrong tơnăp gah yư lĭu; tơdrong tơplih 'nao gơh hơgei gah chih akŏm yư lĭu; tơdrong vei lăng gah kơmăi kơmŏk 'nao păng bơngai jang oei kơƀah. Tổng Bí thư akhan, Hơnih chih akŏm yư kĭu kuôk ya  băt hơdah, tơlĕch jang tơnăp 5 pơkăp jang tih, lơ̆m noh akŏm pơjing Hơnih chih akŏm jing “plei nuih” kơ tơdrong jang mŭk drăm kăl, tơpôl kăl; jĭ “ 'ngok tơm” 'măn iŏk jang tơnăp ăn tơdrong pơgơ̆r jang đơ̆ng Đảng, Teh đak păng tơdrong jang lơ̆m tơpôl.