Lăp đơ̆ng rŏng pơm lêh sơng, Tổng Bí thư Tô Lâm hăm Tổng Bí thư, Kơdră chĕp pơgơ̆r Teh đak Lào Thongloun Sisoulith chĕp kơ̆l khul kơdră kơpal tang măt ƀar teh đak pơgơ̆r pơma đam, pơma dơnuh rim trong vă jang păng hơnơ̆ng atŏk kơtang tơgoăt tơgoăl jang hơdoi Việt Nam – Lào atŏk tơ iung ‘nao lơ̆m khei năr kơnh. Iung pơma tơ̆ pơma đam, Tổng Bí thư Tô Lâm sơkơ̆t hơdăh Đảng, Teh đak păng kon pơlei Việt Nam tôch chơt hơ iă ‘nă hal sơng hơvơn Tổng Bí thư, Kơdră chep pơgơ̆r teh đak Lào atŭm hăm Hơkăn păng Khul kơdră kơpal iung năm tơmang Việt Nam; pơma hơdăh ‘nou jĭ kơdră chĕp pơgơ̆r teh đak đe blŭng a năm tơmang Việt Nam lăp đơ̆ng rŏng Hop akŏm tih kơdră tang măt lơ̆m teh đak ‘măng mă XIV kơ Đảng Cộng sản Việt Nam, tơƀôh hơdăh jơhngơ̆m đon lui yom kơtang păng pơvei kơjăp đơ̆ng Đảng, Teh đak Lào adoi nhen kơdih Tổng Bí thư, Kơdră chĕp pơgơ̆r Lào hăm Việt Nam. Găh kơdih kou, Tổng Bí thư, Kơdră chĕp pơgơ̆r teh đak Lào Thongloun Sisoulith hmach chơt hơ iă iŏk đei jơnei keh kong Hop akom tih ‘mămng mă XIV kơ Đảng Cộng sản Việt Nam, adoi hmach chơt hơ iă kơ Tổng Bí thư Tô Lâm hơnơ̆ng đei Hop akŏm tih lui yom pôk tơmơ̆t iŏk jang dơ̆ng Tổng Bí thư Khul kơdră chĕp pơgơ̆r Trung ương Đảng jăl XIV.