Ƀĭ thư mă mônh, Kơdră teh đak Cuba Miguel Diaz-Canel thơ thou chơt hơ-iă kơ Đảng bơ̆n hlôi pơgơ̆r keh kong Hop akŏm Đảng 'măng mă 14, thơ thou kơ Ƀan châ̆p hanh Trung ương, Hơnih tơm Chinh trĭ păng kơdih po ƀok Tổng Bí thư Tô Lâm hlôi đei Hop akŏm lui ngeh pôk jang kơchư̆k kơpal lơ̆m jăl jang ou kơnh. Tổng Bí thư Tô Lâm sơkơ̆t hơdah Hop akŏm mă 14 hlôi đei jơnei 'lơ̆ng rŏ, keh đang sơnong jang kăp gĭt tih tên. Hop akŏm hlôi pơtôch tơdrong pơm kiơ̆ Tơchơ̆t Hop akŏm 13, sơkơ̆t hơdah 40 sơnăm Tơplih 'nao păng jang đei jơnei Tơchơ̆t Tơlĕch jang hơtŏk mŭk drăm – tơpôl, tơlĕch dôm sơnong jang ăn 5 sơnăm truh, pơkăp dôm tơdrong jang kăp gĭt hăm khei năr hơnô̆ hơnăp kơnh păng tơdrong hơrih kơ kon pơlei Việt Nam lơ̆m anglŏ sơnăm hơtŏk tơ-iung 'nao.

Tổng Bí thư Tô Lâm sơkơ̆t hơdah Việt Nam lăng tơgĭt tơbôl kăp gĭt hăm teh đak Cuba, kơchăng jang tôm tơdrong kiơ vă hơnơ̆ng hơtŏk tơdrong tơguăt juăt jue, pơih să, hơtŏk đei jơnei tơdrong jang ƀar pah, kơyuơ tơdrong pơyua ăn kon pơlei 2 teh đak, kơyuơ tơdrong rơngei hiôk hian, jang hơdoi păng hơtŏk tơ-iung tơ̆ rim tơring păng lơ̆m apŭng plenh teh.