Kơsơ̆ brei, 21/9 tơ̆ Hà Nội, Grŭp jang Kơmăy kơmŏk – Unh hơyuh teh đak Việt Nam (Petrovietnam) pơm lêh tơbăt 50 sơnăm pơjing păng sơng iŏk mê đai Bơ̆ jang dơ̆ng mă mônh. Truh akŏm păng iung pơma lơ̆m Lêh tơbăt, Tổng bí thư Tô Lâm pơma truh hơnăp jang gĭt kăl đơ̆ng Petrovietnam, rim sơnăm tơgop đơ̆ng 20-30% jên thu mong ăn teh đak, tơgop gĭt kăl pơm sơđơ̆ng ăn mŭk drăm lơ̆m teh đak, vei lăng ‘lơ̆ng tơdrong sơđơ̆ng unh hơyuh teh đak; tơƀôh hơdăh anih dơ̆ng đơ̆ng anih tĕch mơdro kơ teh đak hơnơ̆ng yak hơdrol lơ̆m tơdrong mât jang hơdoi găh mŭk drăm hăm apŭng plenh teh.

Yak mât lơ̆m chăl ‘nao, Tổng Bí thư athei Petrovietnam hơnơ̆ng hơtŏk tơdrong juăt Nuih mơng vă pơjing Grŭp jang Kơmăy kơmŏk – Unh hơyuh teh đak pran kơtang; Petrovietnam athei jing anih jang tơm pơjing trong jang pơm kơtŏk kơjă đơ̆ng kơmăy kơmŏk ‘nao, năm hơdrol lơ̆m tơdrong jang unh hơyuh ‘nao păng unh hơyuh rơgoh; iŏk khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆ pơm ‘long tưk vă jang tŏk.