Tổng Bí thư ră hơdah, Việt Nam hơnơ̆ng lăng tơgĭt tơdrong jang tơbôl juăt jue 'lơ̆ng rŏ hăm Nga, lơ̆m noh jang hơdoi gah pơtho kan ƀô̆ dơnơm kăp gĭt, tơgop hơtŏk pơ-'lơ̆ng bơngai jang ăn tơdrong tơ-iung pơjing păng vei lăng teh đak lơ̆m chăl 'nao dang ei. Tổng Bí thư bơnê kơ dôm tơdrong jang hơdoi đơ̆ng Hŏk viê̆n Chĭnh trĭ kuôk ya Hồ Chí Minh păng Hŏk viê̆m Hanh chĭnh Kơdră teh đak Nga lơ̆m khei năr ou ki; lui ngeh 'măng năm tơmang păng pơm jang đơ̆ng Khul kơpal gô tơgop hơtŏk hloh dơ̆ng tơdrong jang hơdoi kơ 2 Hŏk viê̆n păng dôm hơnih jang kơpal kơ 2 teh đak; atŭm hăm noh pơih lơ trong jang hơ-iă lơ̆m pơtho pơhrăm, chih hơlen khua hŏk păng jang hơdoi lơ tơdrong.

Sơkơ̆t hơdah Đảng păng Teh đak Việt Nam hơnơ̆ng pơm trong hiôk vă pơih să jang hơdoi đơ̆ng dôm hơnih pơtho pơhrăm, chih hơlen dôm tơdrong kŏng ngê̆ 'nao, tơplih 'nao gơh hơgei, tơplih kơmăi kơsô̆ păng dôm tơdrong jang 'nao nai, Tổng Bí thư Tô Lâm pơtruh nơ̆r 2 Hŏk viê̆n pơtoi iŏk yua dôm tơdrong jang đei jơnei; pơih să dôm tơdrong tơguăt pơtho pơhrăm gah kuan trĭ kŏng, pơma xa chinh trĭ, hơmet 'lơ̆ng hanh chĭnh, vei lăng trong pơm jang, tơplih kơsô̆ lơ̆m tơdrong jang kơ teh đak păng tơdrong pơgơ̆r ah jăl kơpal. Atŭm hăm noh, pơtrŭt hơtŏk asong bơngai pơtho, bơngai hŏk hơlen, bơngai hŏk; pơgơ̆r akŏm hŏk hôp khua hŏk vă tơroi gah tơdrong hlôh vao lơ̆m pơjing Jơnŭm pơgơ̆r teh đak gơh hơgei, hơbĕch hơbal păng vei lăng hơtŏk tơ-iung teh đak.